14 kúnniń qorytyndysy boiynsha almatylyq ónertapqysh Ábdýáli jáne Ajar Baeshovtar katalizator kómegimen sýdan sýtegin alý jobasy boiynsha 1 orynyn saqtap qaldy. Qazaqstandyq telekórermender olarǵa eń kóp daýys (3859) berdi. Ónertapqysh erli-zaiypty úi jaǵdaiynda ekologiialyq otyn retinde paidalanatyn sýtegin alý jolyn usynady.
Bul juptan bólek, 2-3 oryndar úshin tartys qaraǵandylyq ónertapqysh Áli Mehtiev pen Atyraý oblysynyń ókili Erjan Nuridenovtyń arasynda ótip jatyr. Olardyń «Energiia saqtaityn teris qysymdy bý elektr jylytqyshy» jáne «Jasandy kún-jel aǵashy» atty jobalaryn 5,5 myńnan kóp qazaqstandyq qoldaǵan.
Sondai-aq telebaiqaýǵa qatysýshylar sany ár apta saiyn artyp kele jatqanyn aita ketken jón. Qazirdiń ózinde elimizdiń 8 aimaǵynan 25 ǵalym óz jumystaryn kópshilik nazaryna usynyp úlgerdi. Uiymdastyrýshylardyń aitýynsha, atalǵan jobaǵa tilek bildirýshiler sany kún saiyn eselene túsýde.
Eske sala ketsek, 2016 jyldyń tamyz aiynda «Astana EKSPO-2017» UK» AQ jáne QR Energetika ministrligi «jasyl» tehnologiialar salasyndaǵy qazaqstandyq ónertapqyshtar arasynda «Bolashaq energiiasy» atty televiziialyq baiqaý jariialaǵan bolatyn.
Atalǵan jobada arnaiy qazylar alqasy joq. Qazaqstandyqtar jeńimpazdy ózderi anyqtaidy. Jeńiske jetken ónertapqysh óz jumysyn EKSPO-2017 Halyqaralyq kórmesi barysynda Qazaqstan Respýblikasynyń Ulttyq pavilonynda tanystyrý múmkindigine ie bolady.
Eń qyzyq dep tapqan joba úshin siz www.yourexpo.kz saityna kirip, daýys bere alasyz. Ónertapqyshtar osy saitta baiqaýǵa qatysý týraly ótinish qaldyra alady.
"Ult aqparat"
