Qazaqstanda «Bolashaq» halyqaralyq baǵdarlamasyn damytýdyń jańa strategiiasy ázirlenip jatyr. Bul týraly Ǵylym jáne joǵary bilim ministri Saiasat Nurbek málimdedi, dep habarlaidy "Ult aqparat".
«Qazir aldaǵy úsh jylǵa arnalǵan «Bolashaqtyń» jańa strategiiasy ázirlenip jatyr. Biylǵy naýryzda respýblikalyq komissiianyń otyrysyna shyǵaryp, odan keiin tanystyrýdy josparlap otyrmyz», — dedi Saiasat Nurbek Parlament Májilisinde tilshiler suraǵyna jaýap bere otyryp.
Ministr jańa strategiiada mańyzdy máseleler eskerilgenin aitty.
«Sonymen qatar irikteý jumystaryn kúsheitemiz. Máselen, taǵylymdamadan ótý úshin endi ǵylymi maqalaǵa qatysty talaptar qoiylady. Ǵalymdar jumys istep turǵan zerthanalarǵa jiberiledi. Olar jyl saiyn elge oralǵan kezde ǵylymi jobalaryn óndiriske engizý týraly esep berýi tiis», - dedi ministr.
