«Bolashaq» halyqaralyq baǵdarlamasy boiynsha oqýǵa usynylatyn sheteldik JOO-nyń tizimi keńeitildi. Tizimge 23 jetekshi sheteldik tehnikalyq ýniversitet endi, dep habarlaidy "Ult aqparat" BǴM baspasóz qyzmetine silteme jasap.
Osylaisha, Bilim jáne ǵylym ministrligi Memleket basshysynyń tapsyrmasy boiynsha «Bolashaq» halyqaralyq baǵdarlamasyn qaita baǵdarlaý jumystaryn júrgizip jatyr.
Bul tizimde Eindhoven tehnikalyq ýniversiteti, Gambýrg ýniversiteti, Lester ýniversiteti, Phohan ǵylym jáne tehnologiia ýniversiteti, Drezden tehnikalyq ýniversiteti jáne t.b. bar.
«Bolashaq» baǵdarlamasy boiynsha kadrlar daiarlaýǵa basymdyq tehnikalyq mamandyqtarǵa berilip keledi. Biyl granttardyń 60%-y tehnikalyq mamandyqtarǵa bólinedi. Osyǵan bailanysty «Bolashaq» baǵdarlamasy boiynsha stipendiattar bilim alatyn ýniversitetterdiń tizimin keńeittik. Eger buryn tizimde 213 JOO usynylsa, qazir olardyń sany 236-ǵa jetti. Biz sheteldik ýniversitetterdiń sanyn kóbeitip qana qoimai, sonymen birge olardyń geografiiasyn da keńeitip jatyrmyz. Byltyrdyń ózinde biz geografiiamyzdy tórt elmen tolyqtyrdyq. Olardyń qatarynda Aýstriia, Chehiia, Irlandiia jáne Ońtústik Afrika bar», - dep atap ótti «Halyqaralyq baǵdarlamalar ortalyǵy» AQ basqarma tóraǵasy Ánýar Janǵozin.
Tizimde top-250 halyqaralyq akademiialyq QS World University Rankings, Academic Ranking of World Universities, Times Higher Education World University Rankings reitingterine enetin JOO jáne BRIKS elderiniń top-20 ulttyq reitingterine kiretin ýniversitetter bar.
