2022 jyly «Bolashaq» baǵdarlamasy boiynsha tehnikalyq jáne IT mamandyqtarǵa grant sany 36%-dan 60%-ǵa deiin ósedi. Bul - oqytýdyń osy baǵyttary boiynsha úmitkerlerdi qoldaýdyń qosymsha sharalarynyń biri, dep habarlaidy QazAqparat.
Sonymen qatar, tehnikalyq daiyndyq baǵyttary boiynsha úmitkerler úshin shet tilin meńgerýge arnalǵan IELTS testiniń ortasha baly tómendetildi.
Endi 5.0 ball jetkilikti jáne bir jyl tildik daiyndyqtan ótý múmkindigi de qarastyrylǵan.
Bul sharalar tehnikalyq mamandyqtar boiynsha oqytý múmkindigin keńeitedi.
«QR BǴM Prezident Qasym-Jomart Toqaevtyń tapsyrmasy boiynsha baǵdarlamany qaita baǵdarlaý protsesin bastady. Endi injenerlik-tehnikalyq kadrlardy daiyndaý basymdyqqa ie bolmaq. Sondai-aq «Injenerlik-tehnikalyq qyzmetkerler» jeńildetilgen sanatyn engizý qarastyrylyp jatyr. «Bolashaq» baǵdarlamasyna qujat tapsyrý kezinde olar mindetti túrde sheteldik ýniversitetterge óz betinshe túspeidi. Olar aldymen til kýrstarynan ótip, stipendiia taǵaiyndalǵannan keiin baǵdarlama boiynsha oqýǵa usynylǵan ýniversitetter tiziminen oqý ornyn tańdai alady», - dep atap ótti «Halyqaralyq baǵdarlamalar ortalyǵy» AQ prezidenti Ánýar Janǵozin.
Sonymen qatar aýyldyq jerlerden kelgen úmitkerlerdiń de múmkindikterin arttyrý josparlanyp otyr.
Mysaly, IELTS nátijesimen aǵylshyn tilin meńgerý deńgeiin 5.0 balǵa deiin tómendetý, aýyldyq jerde mindetti turý merzimi 3 jyldan 2 jylǵa deiin qysqartý josparda bar, olarǵa tildik daiyndyqtan ótýge múmkindik beriledi.
Odan bólek, aýdandyq mańyzy bar qala turǵyndaryn qosý arqyly aýyldyq jerlerden kandidattardyń kontingentin keńeitý jáne olardyń sanyn ulǵaitý usynyldy.
