Bokstan álem chempiony Temirtas Júsipovke Kókshetaýda páter kilti jáne aqshalai sertifikat tapsyryldy, dep habarlaidy QazAqparat oblystyq dene shynyqtyrý jáne sport basqarmasynyń baspasóz qyzmetine silteme jasap.
Aqmola oblysynyń ákimi Ermek Marjyqpaev quttyqtaý sózinde oblysta sport dástúri myqty ekenin jáne sport qozǵalysyn damytý úshin kóp nárse jasalyp jatqanyn atap ótti.
«Biz aqmolalyqtar Temirtastyń jeńisin maqtan tutamyz! Bul erekshe jeńis. Bul erler arasyndaǵy álem chempionatynda Aqmola oblysynyń alǵashqy altyn medali.Temirtas tájiribeli sportshy. Osy joǵary marapatqa jetý jolynda ol áskeri qyzmetkerler arasynda eki ret álem chempionattaryn jeńip aldy. Bul jeńisterdiń laiyqty nátijesi álem chempionatynyń altyn medali boldy», - dedi Ermek Marjyqpaev.
Temirtas Júsipovtiń álem chempiony medali Táýelsizdiktiń 30 jyldyǵynda tek aqmolalyqtar úshin ǵana emes, búkil elimiz úshin erekshe syi boldy.
Aimaq basshysy jeńimpazǵa páter kiltin jáne aqshalai sertifikatty tabys etse, al onyń jeke jattyqtyrýshysy Qýanyshbai Qoqyshevtiń erekshe eńbegi men joǵary kásibiligin atap ótti. Sondai-aq oǵan da aqshalai sertifikat tapsyryldy.
Eske sala ketsek, Belgradta (Serbiia) ótken XXI álem chempionatynda aqmolalyq boksshy 48 kelige deiingi salmaq dárejesinde jeńiske jetti. Sheshýshi jekpe-jekte ol Tailand ókili Výttichai Iýrachaidy jeńdi.
