Polshanyń Keltse qalasynda ótip jatqan jastar arasyndaǵy álem chempionatynda erler arasynda qazaqstandyq 5 boksshy jartylai finalǵa joldama aldy, dep habarlaidy "Ult aqparat" Qazaqstan boks federatsiiasyna silteme jasap.
Bul elimizdiń bylǵary qolǵap sheberleriniń kem degende qola medal ielenýine múmkindik jasaidy. Qazaqstan quramasynyń aldynda tek Resei tur.
Aita keteiik, shirek finalda qazaqstandyq 10 boksshy saiysqa túsken bolatyn. Olardyń arasynan tek beseýi jarysty jalǵastyrýǵa múmkindik aldy. Al Reseide - 7, Úndistan, Ýkraina men Ózbekstanda - 4, Kýbada - 3, Bolgariiada - 2, Mońǵoliia, Italiia, Kolýmbiia, Qyrǵyzstan, Braziliia, Vengriia, Armeniia, Polsha, Ázerbaijan, Chernogoriia men Japoniiada - 1 boksshy endi jartylai finalda sharshy alańǵa shyǵady.
Aita keteiik, 49 kelide qazaqstandyq Sanjar Táshkenbai ózbek elinen kelgen Ibrohim Ýshjonovty jeńip ketti. Kelesi joldamaǵa 56 kelidegi Erbolat Sabyr ie bolyp, ol jartylai finalda reseilik Aleksei Shendrikpen qolǵap túiistiredi.
Qorjynǵa taǵy bir júldeni 64 kelidegi Sabyrjan Aqqalyqov túsirdi. Kýbalyq Darian Favier Kastromen jekpe-jekke shyqqan ol tóreshiler sheshimimen jarysty jalǵastyratyn boldy.
Al 75 keli salmaqtaǵy Dias Moljigitov litvalyq Aleksandr Trofimchýktiń osal tusyn tapty. Kelesi qarsylasy - reesilik Mihail Ýsov.
Jartylai finalǵa joldama alǵan taǵy bir qazaqstandyq boksshy Elnur Súiinbai 60 kelide shirek finalda jeńiske jetti. Endi ol jartylai finalda Djon Elin Orobio Siniestrmen qolǵap túiistiredi.
Al qyzdar arasynda qazaqstandyq boksshylar arasynan Juldyz Shaiahmetova (60 keli) Jasmin Qizatova (69 keli) Ásel Saǵatova (81 keli) Eldana Tálipova (81 keliden joǵary) osyndai múmkindikke ie bolǵan edi.
Jartylai final 20 sáýirge belgilengen. Al 22-23 sáýir kúnderi jeńimpazdar anyqtalady.
