Foto: tengrinews.kz
Tanymal qazaqstandyq boksshy Daniiar Eleýsinov (11-0, 6 KO) Halyqaralyq boks uiymynyń (IBO) nusqasy boiynsha jartylai orta salmaqtaǵy álem chempiony ataǵynan aiyryldy, dep habarlaidy QazAqparat agenttigi Sports.kz-ke silteme jasap.
2022 jyldyń 27 jeltoqsanyndaǵy jaǵdai boiynsha Eleýsinov IBO saityndaǵy álem chempiondarynyń tiziminde joq, buǵan deiin onyń esimi men sýreti tiisti bólimde turǵan. Sonymen qatar bedeldi BoxRec.com portalynda jartylai orta salmaqtaǵy chempiondyq belbeý bos dep kórsetilgen.
Eleýsinovtiń chempion ataǵynan aiyrylýy boksshynyń jekpe-jekteri arasyndaǵy ýaqyt uzaqtyǵymen bailanysty bolýy múmkin. IBO erejesi boiynsha aýyr salmaqty qospaǵanda, árbir salmaq sanatyndaǵy álem chempiondary toǵyz aida bir ret (aýyr salmaqtaǵylar úshin bul kezeń bir jyl) dárejesin qorǵaýdy talap etedi. Erejeni buzýǵa tek meditsinalyq sebep boiynsha jáne/nemese IBO-nyń sheshimimen ǵana ruqsat beriledi.
Al qazaqstandyq boksshy Eleýsinov IBO tujyrymy boiynsha álem chempiony ataǵyn jeńip alǵannan beri birde-bir ret dárejesin qorǵamaǵan.
Daniiar Eleýsinov sońǵy jekpe-jegin ótken jyldyń 18 jeltoqsanynda Astanada ótkizip, argentinalyq Hýan Ernan Lealdy (15-3, 4 KO) jeńip, IBO chempiony ataǵyn jeńip alǵan bolatyn.
Eske salsaq, buǵan deiin Daniiar Eleýsinov jaqyn arada sporttyq mansabyn aiaqtaý máselesine qatysty pikir bildirip, boks ózine onsha unamaityndyǵy týraly aitqan edi.
