Belgili sportshy, áýesqoi bokstan álem chempiony, Olimpiada oiyndarynyń eki dúrkin kúmis júldegeri Bolat Jumadilovke eki bólmeli páteri qaitaryldy. Bul týraly «Qazaqstan sportshylar odaǵy» respýblikalyq qoǵamdyq birlestiginiń tóraǵasy Azamat Qarlyǵashev aityp berdi, dep habarlaidy QazAqparat tilshisi.
Spikerdiń aitýynsha, birneshe ai buryn oǵan bank ókilderi habarlasyp, sportshyny izdep taba almai jatqanyn habarlaǵan.
«Bokstan qazaqtyń jaryq juldyzy Bolat Jumadilov – bizdiń qoǵamnyń qurmetti múshesi. Sondyqtan bankten mán-jaidy suraǵanda, ol banktegi qaryzyn qaitara almai júrgeni belgili boldy. Onyń ústine, sol kezde sot sheshimi shyǵyp, sot oryndaýshylary men baǵalaýshylar kelip, páterin alyp qoimaqshy bolǵan. Osy syn saǵatta bizdiń Sportshylar odaǵy, sportshylar men Olimpiada chempiondary Bolatqa kómek kórsetýge bel sheshtik. Biz «ForteBank» pen Ulttyq bank basshylyǵyna hat jazyp, atalǵan máseleni sheshýge kómek kórsetýdi suradyq. Sondai-aq olarmen kezdestik. Osydan soń komissiia qurylyp, qaita qarjylandyrý, aresti alyp tastaý, basqa da sheshimder shyqty. Allaǵa shúkir, máselemiz sheshildi. Osy oraida Bolattai qazaq boksynyń jaryq juldyzyn eskerip, máselesin túsinip, kómek kórsetkeni úshin bankterdiń basshylyǵyna alǵys aitamyz. Qazir Bolat otbasymen Astanada, óziniń eki bólmeli páterinde turyp jatyr», - dedi Azamat Qarlyǵashev.
Ol sondai-aq Sportshylar odaǵy tarapynan sportshylardyń basqa da máseleleri boiynsha kómek kórsetilip jatqanyn atap ótti.
«Shyny kerek, biz basqa da sportshylarǵa kómektesip júrmiz. Mysaly, aýyr atletikadan Aziia chempiony Aidar Qazovtyń joǵaryda atalǵan máselege uqsas problemasyn sheshýge qol ushyn berdik. Al qazir aýyr atlet, Olimpiada oiyndarynyń qola júldegeri Zúlfiia Chinshanloǵa kómektesip jatyrmyz. Jalpy, sportshylarymyz osyndai máselelerge tap bolǵan kezde jáne olardyń zań aiasyndaǵy jumystardy jaqsy bile bermeýi sebebinen olarǵa árqashan kómekke kelýge daiynbyz», - dedi spiker.
