Tennis ortalyǵynda bokstan erler arasynda Qazaqstan chempionaty márege jetip, barlyq salmaq dárejeleri boiynsha úzdik shyqqandar anyqtaldy, dep habarlaidy QazAqparat.
Sońǵy básekeler barynsha tartysty ótti.
Aqmola oblysynyń ókili Orazbek Asylqulov 57 kg salmaqta qostanailyq Aidos Arapovty 3:2 esebimen utyp, chempion atandy.
60 kg salmaqta qaraǵandylyq Vasilii Samchýk shyǵysqazaqstandyq Ádilet Qurmetovten ailasyn asyrdy.
Al 63,5 kg salmaqta almatylyq Dilmurat Mijitovtiń mereii ústem boldy. Ol tartysty jekpe-jekte shymkenttik Abzal Serikti jeńdi - 3:2.
Osy eki salmaqta biylǵy álem chempionatyna qatysqan mańǵystaýlyqtar Samatáli men Sanatáli Tóltaevtar jartylai finaldan asa almai, qola júldeni qanaǵat tutty.
67 kg salmaqta jambyldyq Dýlat Bekbaýov Almaty oblysynan kelgen Darhan Dúisebaidan basym ekendigin kórsetti - 5:0.
71 kg salmaqta shyǵysqazaqstandyq Ermahan Jakpekovtiń baǵy jandy. Ol finalda pavlodarlyq Qýan Qýatovty qapy qaldyrdy - 4:1.
75 kg salmaqta biylǵy álem chempionatynda el namysyn qorǵaǵan atyraýlyq Nurqanat Raiys qatty qarsylyq kórsetken pavlodarlyq Aiatýlla Tákijanovty jeńdi - 3:2.
80 kg salmaqta 2021 jylǵy álem birinshiliginde baq synaǵan elordalyq Nurbek Oralbai aqtóbelik Jánibek Qartbaevtyń osal jerin tapty - 5:0.
86 kg salmaqta túrkistandyq Saǵyndyq Toǵambai almatylyq Mádi Ámirovti báseke sońynda nokdaýnǵa jiberdi - 5:0.
92 kg salmaqta taǵy bir elordalyq, biylǵy álem birinshiliginde ringke shyqqan Aibek Oralbai men áskeriler arasynda álem chempiony, túrkistandyq Abzal Quttybekov qolǵap túiistirdi. Jeńis A.Oralbaiǵa berildi - 4:1.
Asa aýyr salmaqta 2021 jylǵy álem chempionatyna qatysýshy, túrkistandyq Nurlan Saparbai men atyraýlyq, 19 jastaǵy Amanat Sabyrǵali sońǵy básekege shyqty. Munda N.Saparbaidyń mereii ústem boldy - 5:0.
Osylaisha Oralda erler arasynda el chempionaty aiaqtaldy. Biylǵy birinshilikte birqatar jastar da jarqyrai kórindi. Ásirese, 48 kg salmaqta top jarǵan 18 jastaǵy Sanjar Táshkenbaidy erekshe ataýǵa bolady.
