Búgin bokstan erler arasynda Oralda bastalatyn Qazaqstan chempionatynda jeńimpaz atanǵandar aldaǵy iri jarystarda el namysyn qorǵaidy. Bul týraly Óńirlik kommýnikatsiialar qyzmeti alańynda ótken brifingide Olimpiada chempiony, Qazaqstan boks federatsiiasynyń vitse-prezidenti Baqtiiar Artaev málim etti, dep habarlaidy QazAqparat.
Onyń aitýynsha, Qazaqstan birinshiliginde biylǵy álem chempionatyna qatysqan boksshylar da baq synaidy.
«Tek álem chempiondary men júldegerleri jarystan bosatyldy. Biylǵy Qazaqstan birinshiliginde ádil qazylyq jasalyp, eń myqtylar ulttyq quramaǵa irikteletin bolady. Aldaǵy jyly aldymen 23 qańtar – 1 aqpanda Ózbekstan astanasy Tashkent qalasynda 19-23 jastaǵylar arasynda Aziia chempionaty ótedi. Sodan keiingi iri doda – Aziia oiyndary. Sondai-aq álem kýbogynda komandalyq saiys bolady. Álem kýbogynyń júlde qory 2 mln AQSh dollary bolady degen joramal bar. Mine, osy úsh jarysta biylǵy chempionatta jeńimpaz atanǵandar el namysyn qorǵaidy», - dedi B.Artaev.
Qazaqstan boks federatsiiasynyń atqarýshy direktory Maratbek Myqtybekov Táýelsizdiktiń 30 jyldyǵyna orai uiymdastyrylǵan el chempionatynda 13 salmaq dárejesinde jeńimpaz-júldegerler anyqtalatynyn, birinshilikti ótkizý úshin barlyq jaǵdaidyń jasalǵanyn jetkizdi.
«Qazaqstan chempionatyna elimiz qalalary men oblystarynan 211 boksshy qatysyp, baq synamaqshy. Batys Qazaqstan oblysynyń namysyn biylǵy Aziia chempionatynyń kúmis júldegeri Daniial Sábit bastaǵan 10 sportshy qorǵaidy», - dedi BQO boks federatsiiasynyń prezidenti Baýyrjan Kárimov.
