1 maýsymnan bastap Qazaqstan qalalary arasyndaǵy blokpostardyń alynýy qazaqstandyqtardyń qalypty ómirge qaityp keletinin bildire me? Bul suraqqa Densaýlyq saqtaý ministri Eljan Birtanov jaýap berdi, dep habarlaidy QazAqparat.
«Shynynda da bizdiń qazirgi basty maqsat – eldi qalypty ekonomikalyq belsendi ómirge qaitarý. Sonymen birge azamattardy osy epidemiiadan qorǵaýymyz kerek. Áitse de epidemiiaǵa qarsy sharalar, sonyń ishinde shekteý sharalary kúshinde qalady. Karantinniń birneshe kezeńi bar. El ishindegi qozǵalysty shekteýdi alyp tastaý – aimaqtar boiynsha koronavirýsty juqtyrý jaǵdaiy rettelip, teńesip qalǵanyn bildiredi. Iaǵni adamdardy ary qarai qozǵalystan shekteýdiń qajeti joq. Áitse de eń birinshi kezekte jumysta, qoǵamdyq oryndar men kólikterde epidemiiaǵa qarsy sharalardy saqtaý erejeleriniń talaby kúshinde bolady. Ony saqtanýdyń mańyzy zor», - dedi Eljan Birtanov Densaýlyq saqtaý ministrliginiń Facebook paraqshasynda «Habar 24» arnasy tilshisiniń suraǵyna jaýap bere otyryp.
Ministrdiń aitýynsha ókinishke qarai jumys oryndarynda jumys berýshilerdiń keibiri qyzmetkerleri úshin qaýipsizdik jaǵdaiyn qamtamasyz etpeidi.
«Qoǵamdyq kólikterde de keide adamdardyń tolyp turǵanyn kóremiz. Maskasyz júrgen adam qanshama. Saýda oryndarynda da bul talaptardy saqtamai júrgender kóp. Mundai jaǵdaida óte qatań sharalardy iske asyrýǵa májbúr bolamyz. Eń bastysy – infektsiianyń taralýy qaýpi azaiǵannan keiin karantin tártibi jeńildetilip kele jatqanyn túsinýi kerek. Alaida infektsiia eshqaida quryp ketken joq. Adamdar onyń aýyr túrine de shaldyǵyp qalýy múmkin. Sondyqtan onyń aldyn alýdyń mańyzy óte zor», - dedi Eljan Birtanov.
