1 ماۋسىمنان باستاپ قازاقستان قالالارى اراسىنداعى بلوكپوستاردىڭ الىنۋى قازاقستاندىقتاردىڭ قالىپتى ٶمٸرگە قايتىپ كەلەتٸنٸن بٸلدٸرە مە? بۇل سۇراققا دەنساۋلىق ساقتاۋ مينيسترٸ ەلجان بٸرتانوۆ جاۋاپ بەردٸ, دەپ حابارلايدى قازاقپارات.
«شىنىندا دا بٸزدٸڭ قازٸرگٸ باستى ماقسات – ەلدٸ قالىپتى ەكونوميكالىق بەلسەندٸ ٶمٸرگە قايتارۋ. سونىمەن بٸرگە ازاماتتاردى وسى ەپيدەمييادان قورعاۋىمىز كەرەك. ەيتسە دە ەپيدەميياعا قارسى شارالار, سونىڭ ٸشٸندە شەكتەۋ شارالارى كٷشٸندە قالادى. كارانتيننٸڭ بٸرنەشە كەزەڭٸ بار. ەل ٸشٸندەگٸ قوزعالىستى شەكتەۋدٸ الىپ تاستاۋ – ايماقتار بويىنشا كوروناۆيرۋستى جۇقتىرۋ جاعدايى رەتتەلٸپ, تەڭەسٸپ قالعانىن بٸلدٸرەدٸ. ياعني ادامداردى ارى قاراي قوزعالىستان شەكتەۋدٸڭ قاجەتٸ جوق. ەيتسە دە ەڭ بٸرٸنشٸ كەزەكتە جۇمىستا, قوعامدىق ورىندار مەن كٶلٸكتەردە ەپيدەميياعا قارسى شارالاردى ساقتاۋ ەرەجەلەرٸنٸڭ تالابى كٷشٸندە بولادى. ونى ساقتانۋدىڭ ماڭىزى زور», - دەدٸ ەلجان بٸرتانوۆ دەنساۋلىق ساقتاۋ مينيسترلٸگٸنٸڭ Facebook پاراقشاسىندا «حابار 24» ارناسى تٸلشٸسٸنٸڭ سۇراعىنا جاۋاپ بەرە وتىرىپ.
مينيستردٸڭ ايتۋىنشا ٶكٸنٸشكە قاراي جۇمىس ورىندارىندا جۇمىس بەرۋشٸلەردٸڭ كەيبٸرٸ قىزمەتكەرلەرٸ ٷشٸن قاۋٸپسٸزدٸك جاعدايىن قامتاماسىز ەتپەيدٸ.
«قوعامدىق كٶلٸكتەردە دە كەيدە ادامداردىڭ تولىپ تۇرعانىن كٶرەمٸز. ماسكاسىز جٷرگەن ادام قانشاما. ساۋدا ورىندارىندا دا بۇل تالاپتاردى ساقتاماي جٷرگەندەر كٶپ. مۇنداي جاعدايدا ٶتە قاتاڭ شارالاردى ٸسكە اسىرۋعا مەجبٷر بولامىز. ەڭ باستىسى – ينفەكتسييانىڭ تارالۋى قاۋپٸ ازايعاننان كەيٸن كارانتين تەرتٸبٸ جەڭٸلدەتٸلٸپ كەلە جاتقانىن تٷسٸنۋٸ كەرەك. الايدا ينفەكتسييا ەشقايدا قۇرىپ كەتكەن جوق. ادامدار ونىڭ اۋىر تٷرٸنە دە شالدىعىپ قالۋى مٷمكٸن. سوندىقتان ونىڭ الدىن الۋدىڭ ماڭىزى ٶتە زور», - دەدٸ ەلجان بٸرتانوۆ.
