Almaty oblysynda BMW kóligimen blokposty qiratyp, 2 politsiia qyzmetkeriniń ólimine sebepker bolǵan júrgizýshige qatysty is sotqa joldandy, dep habarlaidy "Ult aqparat".
Azat Azamatovqa qatysty is Qarasai aýdandyq sotyna jiberilip, sýdia Mádi Kóshekbaevqa berildi.
Almaty oblysynyń prokýratýrasy 28 mamyrdaǵy jol apatyna bailanysty A.Azamatovqa qatysty sotqa deiingi tergeý isi bastalǵany týraly habarlaǵan bolatyn. Onyń is-áreketine bailanysty QR QK 345-babynyń 4-bólimimen (mas kúiinde kólik aidap, eki nemese odan kóp adamnyń qazasyna ákelgen jol apatyn týdyrý) boiynsha qylmystyq is qozǵalǵanyn aitqan.
Oǵan deiin qylmystyq is QR QK 99-babynyń 2-bólimimen klassifikatsiialanǵan bolatyn.
Eske salaiyq, 25 mamyr tańǵy saǵat 05:26-da BMW markaly kóliktiń 28 jastaǵy júrgizýshisi mas kúiinde blokpostaǵy politsiia kóligine soǵyldy. Saldarynan eki politsiia qyzmetkeri kóz jumdy. Al zardap shekken úshinshi politsei jaqynda aýrýhanada esin jiyp, aýrýhanadan shyqty.
Keiin QR Ishki ister ministri Erlan Turǵymbaev qylmystyq istiń mán-jaiyn tergeýdi Ishki ister ministrligi ózine alǵanyn málim etti. Osy oqiǵadan keiin Almaty qalalyq Politsiia departamentiniń 9 qyzmetkeri tártiptik jazaǵa tartyldy. Úsh laýazymdy qyzmetker jumysynan bosatyldy.
