Aqtóbede tótenshe jaǵdai rejimin buzǵan 77 derek tirkeldi. 21 jastaǵy júrgizýshi ata-anasyna barý úshin blokbeketti ainalyp ótken, dep habarlaidy QazAqparat.
Aqtóbelik politseiler táýlik boiy qala men oblys aýmaǵyna kirip, shyǵatyn joldaǵy blokbeketterde kezekshilik qoidy. Óńirde 28 blokbeket bolsa, onyń jeteýi Aqtóbe qalasynyń ainalasyna koiylǵan.
«Politsiia qyzmetkerleri jergilikti atqarýshy organ ókilderimen jáne meditsina qyzmetkerlerimen birge jumys isdeidi. 31 naýryzdan bastap bas sanitar dárigerdiń qaýlysyna sáikes Aqtóbe oblysy erekshe tártipke kóshti. Basqa aimaqqa shyǵý jáne kirý joldary jabyldy. Tek tranzittik kólikter júre alady. Ári qoǵamdyq oryndarda patrýldik politsiianyń jumystary kúsheitildi. Esepte turǵan adamdarmen aldyn alý sharasy júrgizildi», - dedi oblystyq politsiia departamentiniń bastyǵy Atyǵai Arystanov.
Aita keteiik, «Samara-Shymkent» tasjolyndaǵy bir blokpost arqyly táýlik saiyn 2 myńǵa jýyq avtokólik ótedi. Negizinde politsiia qyzmetkerleri tranzittik júk kólikterin, azyq-túlik, dári-dármek, aýyl sharýashylyǵy ónimderin tasymaldaityndardy ótkizedi, ózgesine aýmaq jabyq. Bir táýlik ishinde politsiia qyzmetkerleri 1 tártip buzýshylyq faktisin anyqtady. 31 naýryz kúni qala syrtyna ainalmaly jolmen shyqpaq bolǵan 21 jastaǵy azamatty Alǵa aýdanyndaǵy blokbekette ustady. Ol Aqtóbeden shyǵyp, Qandyaǵash qalasyndaǵy ata-anasyna barmaq boldy. Atalǵan fakti boiynsha QR ÁQBtK 476-baby boiynsha ákimshilik hattama toltyryldy. Aqtóbelik sot sheshimimen 5 táýlikke qamaldy.
«Politsiia qyzmetkerleri 77 quqyq buzý deregin anyqtady. ÁQBtK-niń «Tótenshe jaǵdai rejimin buzý» baby boiynsha 69 derek, «Tótenshe jaǵdai kezinde quqyq tártibin buzýǵa itermeleitin is-áreketter» baby boiynsha 8 fakti anyqtaldy. Qarǵaly aýdanynyń Badamsha aýylynda jergilikti dámhananyń ákimshisi ákimshilik jaýapqa tartyldy. Dámhana saǵat 22:00-de jumysyn toqtatpaǵan. ÁQBtK 476-baby boiynsha 10 AEK kóleminde aiyppul salyndy», - dedi oblystyq PD baspasóz qyzmetiniń jetekshisi Erbolat Sarqulov.
