Foto: christiananderl.com
Qazaqstandyq blogerler salyq tóleýge mindetteledi jáne jalǵan aqparat úshin jańa aiyppul engiziledi. Májilis "Onlain-platformalar jáne onlain-jarnama týraly" zań jobasyn birinshi oqylymda maquldady, dep habarlaidy Sputnik Qazaqstan.
Zań jobasyna Parlament depýtattary bastamashy bolǵan. Májilis depýtaty Aidos Sarymnyń aitýynsha, zań jobasynda onlain jarnama, infliýenser jáne jalǵan aqparat uǵymdary engizilgen.
"Osy kezge deiin biz dástúrli jarnamany jaqsy bilemiz. Teledidardy qossaq, aiqyn kórip otyramyz, gazet-jýrnaldardy ashsaq ta, jarnama anyq kórinip turady. Bizdiń oiymyzsha, azamattardyń quqyǵyn qorǵaý úshin, olar aldanbaý úshin, erteń qarjylyq piramidaǵa tap bolmaý úshin áleýmettik jelidegi jarnamany da, demeýshilik kontentti de aiqyn kórsetýimiz kerek. Álemdik tájiribede bul bar. Ol blogerlerden, infliýenserlerden osyny talap etedi", - dedi Sarym Májilistiń jalpy otyrysynda zań jobasyn tanystyryp.
Sondai-aq internet arqyly tabys tabatyn blogerler endi salyq tóleýge mindetteledi.
"Sheteldiń maqaly bar: kez kelgen adam ólim men salyqtan qutyla almaidy degen. Olai bolsa, bizdiń zamandastarymyz da, jýrnalisterimiz de aityp otyr: nege biz barlyǵy úshin salyq tóleimiz, al internette milliardtap, milliondap aqsha jinap jatqan azamattar memlekettik qazynaǵa bir tiyn da quimaidy degen máseleni qoiyp otyr. Osy sebepti biz bloger, infliýenser degen uǵymdy engizdik. Osy sebepti de jarnamanyń san alýan túrlerin zańǵa bekitip, aldaǵy ýaqytta munyń barlyǵy, eń aldymen Kásipkerlik kodekske jáne jyl sońynda keletin Salyq kodeksine enip, sur ekonomikada júrgen dúnieniń barlyǵyn ashyq alańǵa shyǵarý, memleket qazynasyn toltyrýǵa paidalaný qajet dep esepteimiz", - dedi májilismen.
Onyń aitýynsha, búginde jarnamanyń alpys paiyzy internet salasyna ketip jatyr. Bul qazirgi tańda trilliondaǵan aqsha bolýy yqtimal. Zań jobasyndaǵy taǵy bir jańashyldyq – jalǵan aqparat úshin salynatyn aiyppul.
"Basty máseleniń biri – biz jalǵan aqparat degen uǵymdy engizip otyrmyz. Bul bizdiń zańnamany jartylai dekriminalizatsiialaý dep esepteimiz, sebebi barlyq máseleni sot arqyly sheshý kerek jáne onyń ishinde aiyppuldar bolýy kerek. Adam qasaqana emes, qatelesip ketse, basqa da jaǵdaiattar bolsa, jalǵan aqparaty kóp ziian tigizbese, onda 20 AEK (69 000 teńge) mólsherinde aiyppul tóleidi. Eger dál osy áreketti qaitalasa, aiyppul eki eselenedi. Zańdy tulǵalarǵa da osyndai tiisti baspaldaq bar", - dep túsindirdi Sarym.
Májilis depýtattary atalǵan zań jobasyn birinshi oqylymda maquldady.
