AQSh memlekettik hatshysy Entoni Blinken Qytaidyń joǵary shendi diplomaty Ian Tszechimen áńgimesinde Amerika Qurama Shtattary Shyńjańda, Tibet pen Gonkongta adam quqyqtary men demokratiialyq qundylyqtardyń saqtalýyn talap etedi dep málimdedi.
AQSh memlekettik departamentiniń habarlaýynsha, 5 aqpanda telefonmen bolǵan suhbatta Blinken Shyńjańdaǵy musylman halyqtaryn, tibettikterdi jáne Gonkongta demokratiia úshin kúresip jatqandardy qýdalaý máselesin kótergen. Djo Baiden prezident qyzmetine kiriskeli eki eldiń syrtqy ister mekemeleriniń joǵary shendi basshylary alǵash ret telefonmen tildesti.
Twitter-degi habarlamasynda Blinken "AQSh ulttyq múddesin qorǵap, demokratiialyq qundylyqtardy jaqtaitynyn, halyqaralyq júieni ózine paidalanǵany úshin Pekindi jaýapqa shaqyratynyn" aitqan.
Buǵan qosa Blinken Qytaidy halyqaralyq qaýymdastyqqa qosylyp, Mianmadaǵy áskeri tóńkeristi synǵa alýǵa shaqyrdy jáne Úndi-Tynyq muhit alabynda, sonyń ishinde Taivan buǵazynda turaqtylyqqa qater tóndiretin áreketteri úshin Qytaidy jaýapqa tartý jolynda odaqtastarymen áriptestik ornatatynyn málimdedi.
4 aqpanda syrtqy máseleler boiynsha sóz sóilegen AQSh prezidenti Djo Baiden Qurama Shtattar Qytaiǵa "qarsy turǵanymen", "Amerikanyń múddesi úshin qajet bolǵan jaǵdaida Pekinmen jumys isteýge daiyn ekenin" aitty.
