Foto: Instagram.com
Batys Qazaqstan oblysynyń Dostyq aýylynyń turǵyny Nadir Qýanaev qardan Aqorda ǵimaratynyń kóshirmesin jasap, kópshiliktiń nazaryn aýdardy, dep habarlaidy Ult.kz.
Avtordyń aitýynsha, bul týyndyny jasaýdaǵy basty maqsaty – óner arqyly jastarǵa Memleket basshysy Qasym-Jomart Toqaevtyń úndeýin jetkizý.
— Bolashaq jastardyń qolynda. Sondyqtan jas býyndy bilim alýǵa, jańa daǵdylardy meńgerýge yntalandyrǵym keldi. Eńbek etip, talpynsań, kez kelgen maqsatqa jetýge bolady, — deidi Nadir Qýanaev.
Ol bul músin óziniń buryn jasaǵan jumystarynyń ishindegi eń kúrdelileriniń biri bolǵanyn aitady. Soǵan qaramastan, qiyndyqtarǵa moiymai, isti sońyna deiin jetkizgen.
Aita keteiik, Nadir Qýanaev buǵan deiin de qardan jasaǵan erekshe týyndylarymen eldi birneshe ret tańǵaldyrǵan. Ol buryn qala meshitiniń, politsiia kóliginiń, jarys avtomobiliniń jáne ózge de túrli músinderdiń qardan jasalǵan kóshirmelerin usynǵan.
