Qostanai oblystyq soty BQO sport basqarmasynyń burynǵy basshysy Músilim Ońdaǵanovtyń merziminen buryn shartty túrde bosatý týraly ótinishin qanaǵattandyrmady, dep habarlaidy "Ult aqparat".
Qostanai oblystyq sotynyń baspasóz qyzmeti málim etkenindei, biýdjet qarjysyn jymqyrǵany úshin uzaq merzimge sottalǵan M.Ońdaǵanov jazasynyń úshten eki bóligin, 7 jyl 3 aiyn ótegennen keiin ol merziminen buryn shartty túrde bosatý týraly ótinish jasady.
Qostanai qalasy №2 sotynyń biylǵy 8 shildedegi qaýlysymen ótinish qanaǵattandyrylyp, M.Ońdaǵanovqa ótelmegen 2 jyl 6 ai 16 kúnine probatsiialyq baqylaý ornatylyp, merziminen buryn shartty túrde bosanyp shyqty.
Apelliatsiialyq satydaǵy sot 13 tamyzda atalmysh sot qaýlysyn ózgerissiz qaldyrdy.
Mundai sheshim shyǵarýǵa jazasyn óteýshiniń sot úkimine sáikes 51,837 mln teńgeni tolyq ótegeni jóninde BQO ádilet departamenti memlekettik sot oryndaýshysy G.Papashevanyń 2020 jylǵy 29 mamyrdaǵy №8-4204 aqparaty negiz boldy.
Alaida sot qaýlysy shyqqannan keiin Qostanai oblystyq prokýratýrasy teksergen kezde sot oryndaýshysynyń bergen aqparaty shyndyqqa janaspaityn bolyp shyqty. Qazirgi tańda keltirilgen zalal tolyq kólemde ótelmegen. Sottalýshylardan áli óndirilmegen qarjy 67 415 646 teńgeni quraidy.
Osylaisha sot oryndaýshysy sot organdaryn jańylystyrǵan. Bul sot aktilerin qaita qaraýǵa negiz bolyp tabylady.
Jańadan ashylǵan mán-jailarǵa bailanysty QR Qylmystyq is júrgizý kodeksi 499-baby 2-bóligine sáikes Qostanai oblysy prokýratýrasy oblystyq sotqa sot qaýlylaryn qaita qaraý týraly ótinish túsirdi.
Sonymen qatar jábirlenýshi tarap – BQO dene shynyqtyrý jáne sport basqarmasynyń basshysy Q.Esendiiarov ta zalaldyń tolyq kólemde ótelmegendigin keltirip, ótinishtiń qanaǵattandyrylýyna kelispei, qarsylyq bildirgen.
Qostanai oblystyq soty qylmystyq ister jónindegi sot alqasynyń 19 tamyzdaǵy qaýlysymen jańadan ashylǵan mán-jailarǵa bailanysty atalǵan sot aktileriniń kúshi joiyldy.
Jańa qaýlyǵa sáikes M.Ońdaǵanov qamaýǵa alynyp, jazasyn óteýdi jalǵastyratyn bolady.
Aita ketetin jait, 18 tamyz kúni BQO prokýratýrasy memlekettik sot oryndaýshysy G.Papashevaǵa qatysty atalǵan qatynashatty (jalǵan aqparatty) bergeni úshin QR QK 361-babyna sáikes qylmystyq quqyqbuzýshylyq belgileri boiynsha sotqa deiingi tergeýdi bastady.
