Batys Qazaqstan men Pavlodar oblystary Túrkistanǵa tarihi-kieli oryndardyń ortalyǵyn salyp beretin boldy. Búgin óńirge QR Prezidentiniń hattamalyq tapsyrmasyn oryndaý sheńberinde Túrkistan qalasyna osy óńirlerdiń sáýlet jáne qala qurylysy jáne qurylys basqarmalarynyń basshylary keldi, dep habarlaidy "Ult aqparat".
Eki oblystan kelgen Nurlan Qaqambetov pen Altynbek Qaisaǵaliev aimaq basshysy Janseiit Túimebaevtyń qabyldaýynda bolyp, «Túrkistan oblysynyń tarihi-kieli oryndarynyń ortalyǵy» ǵimaratynyń qurylysy boiynsha májiliske qatysty. Jiyn barysynda óńir basshysy qurylys jumystary biyl bastalý kerektigin atap ótti.
«Elbasy tapsyrmasyna sáikes, Túrkistan qalasynda salynatyn nysandardy talqylap, zerdeleýge eń alǵashqy bolyp Pavlodar men Batys Qazaqstan oblysynyń ókilderi kelip otyr. Ol úshin Sizderge jáne Pavlodar oblysynyń ákimi Bolat Baqaýov pen Batys Qazaqstan oblysynyń ákimi Altai Kólginovke alǵys aitamyn. Aldymen alańdaǵy tarihi eskertkishterdiń ornalasý tártibi rettelý kerek. Týristerge jáne qala turǵyndary úshin yńǵaily bolý úshin saýda oryndary jumys jasap, otbasylyq serýendeýge jan-jaqty jaǵdai jasalýy tiis. Ortalyqta boi kóteretin keshenderdiń dálme-dál kóshirmesiniń biiktigi shamamen 3-4 metr bolady. Qoiylǵan tapsyrmany tiianaqty oryndaý úshin úshjaqty kelisimge kelip, jol kartasyn ázirleimiz», - dedi Janseiit Túimebaev.
Óz kezeginde qala qonaqtary jańa oblys ortalyǵynyń kórkeiýine barynsha qoldaý kórsetýge daiyn ekenderin jetkizdi.
