BQO densaýlyq saqtaý basqarmasynyń burynǵy basshysy Bolatbek Qaiýpovqa úkim shyqty, dep habarlaidy "Ult aqparat".
BQO sotynyń baspasóz qyzmeti málim etkendei, Oral qalalyq sotynyń úkimimen B.Qaiýpov para alǵany úshin (QR QK 366-baby 2-bóligi), sondai-aq Serik Turaliev pen Aidos Sebepov para alýda deldaldyq jasaǵany úshin (QK 28-baby 5-bóligi, 366-baby 2-bóligi) aiypty dep tanyldy.
Sot úkimimen B.Qaiýpov - 4 jyl 6 ai, Serik Turaliev pen Aidos Sebepov árqaisysy 3 jyl merzimge bas bostandyǵynan aiyryldy.
Olar jazasyn qaýipsizdigi barynsha tómen qylmystyq-atqarý júiesi mekemesinde óteidi.
Oǵan qosa B.Qaiýpov memlekettik qyzmet atqarý quqyǵynan ómir boiyna aiyryldy.
Sot B.Qaiýpovtyń óziniń qyzmetkeri A.Sebepov pen tanysy S.Turaliev arqyly JShS direktorynan jalpy somasy 78 284 880 teńgege meditsinalyq jabdyq jetkizýge memlekettik satyp alý týraly shartqa kedergisiz qol qoiǵany úshin 7,8 mln teńge para alǵanyn, oryndalǵan jumystar aktisi men jabdyqty qabyldap alǵanyn anyqtady.
Sotqa deiingi tergeý barysynda B.Qaiýpovtan 330 myń teńge, A.Sebepovtan 1 mln 60 myń teńge, S.Turalievtan 4,3 mln teńge tárkilendi.
Sot talqylaýy barysynda B.Qaiýpov 1 mln 670 myń teńge, S.Turaliev 440 myń teńgeni qaitardy.
Sot úkimi zańdy kúshine engen joq.
