Óli adamdardyń denesi beibereket jatyr degen máiithana videosy Batys Qazaqstan oblysy Bórli aýdany Aqsai qalasynda túsirilgen. Muny oblystyń densaýlyq saqtaý basqarmasy rastady.
"Aqsai máiithanasyna kirgendegi kórinis – mynaý. Koronavirýstan qaitys bolǵandardyń denesin osylai beibereket qoia salǵan" deidi kadr syrtyndaǵy áieldiń daýsy. Videoda qara paketke oralǵan syrtqy pishini boiynsha máiitke uqsaityn deneler beinelengen. Videony túsirýshi temir esikti ashqanda onyń arǵy jaǵynda ústel ústinde birneshe máiittiń jatqany kórinedi.
"Rasymen 2020 jyldyń 12 shildesinen 13 shildesine qaraǵan túni Bórli aýdandyq aýrýhanasynyń pataloganatomiialyq bólimine qaitys bolǵandardyń denesi jetkizilgen. Ol jerde oǵan deiin jetkizilgen máiitter de bolǵan. Máiithana qyzmetkeri qyzmettik mindeti boiynsha, normativterge sáikes, máiitterdi dereý iriktep, arnaiy tońazytqyshtarǵa salýy kerek bolǵan, biraq mindetin oryndamaǵan" delingen oblystyq densaýlyq saqtaý basqarmasynyń resmi jaýabynda.
Basqarma sot tergeýiniń bastalǵanyn málimdedi, biraq videony túsirgen adamnyń bailanys málimetin berýden bas tartty. "Jaǵdai baqylaýǵa alyndy" dedi basqarmanyń baspasóz hatshysy habarlamada. Mekeme ózge derekti aitpady.
Koronavirýs pandemiiasyna bailanysty máiithanalardyń jumysyn atqaryp úlgere almai jatqany týraly habarlar eldiń túkpir-túkpirinen kelip jatyr. Olardyń qatarynda Almaty men Oral qalalarynyń máiithanalary da bar.
Resmi statistikaǵa sáikes, Batys Qazaqstan oblysynda 4,4 myń adamnyń koronavirýs juqtyrǵany rastalǵan. Onyń 3,4 myńy jazylyp shyqqan, 22-si qaitys bolǵan. Keshe, 16 shilde kúni oblysta 108 adamnan koronavirýs anyqtaldy. Keiingi aptada bul kórsetkish 90-nan tómendemedi.
Elde pnevmoniia órship, saldarynan qaitys bolǵandar sany artty. Dárigerler pnevmoniiany koronavirýs qozdyryp otyrǵanyn aitsa da, bilik ókpe aýrýyna shaldyqqandardy COVID-19 statistikasyna qospai otyr.
