Batys Qazaqstan oblysynyń «injý-marjany» sanalatyn Shalqar kólinde eskekpen júzý qiynǵa soǵyp otyr, dep habarlaidy "Ult aqparat" 24.kz-ke silteme jasap.
Sebebi oǵan ekologiialyq qater tónip tur. Oral qalasynan ońtústik-shyǵysqa qarai 100 shaqyrym qashyqtyqta ornalasqan kóldiń sýy kúrt azaiyp ketti. Mamandardyń málimetinshe, 2 milliard tekshe metr sýdan qazir 1 jarym millard tekshe metr qalǵan. Uzyndyǵy 18,5, eni 15 shaqyrymdyq kóldiń eni kei jerlerde 2 shaqyrymǵa deiin tartylǵan. Kókserke, taban siiaqty balyq tuqymdary múlde joiylyp ketken. Sazan men shortan balyqtary quryp ketýdiń az-aq aldynda tur. Osyǵan bailanysty oblysta arnaiy komissiia qurylyp, kóldiń jaǵdaiyn kózben kórip qaitty.
«Sý azaiǵandyǵy, jalpy kóldegi sýdyń tuzy kóterilýi, baldyr basyp sýdyń jasyl túske boialýy sekildi kóptegen ekologiialyq máseleler bar. Shalqar kóliniń jaǵdaiyn jaqsartý úshin ǵylymi negizdeme jasaýymyz kerek. Ǵylymi-biologiialyq negizdeme jasaý úshin oblystyq biýdjetten qarjy bóledi. Ol negizdeme ǵalymdardyń eńbegimen jasalady», - dedi oblystyq tabiǵi resýrstar basqarmasy basshysynyń orynbasary Mahambet Yqsanǵali.
