BQO bas memlekettik sanitar dárigeriniń 28 qańtardaǵy jańa qaýlysy shyqty, dep habarlaidy QazAqparat.
BQO sanitarlyq-epidemiologiialyq baqylaý departamentiniń baspasóz qyzmeti málim etkenindei, qashyqtan ótkizý múmkindigi bolmaǵan jaǵdaida karantin talaptaryn saqtai otyryp, jinalys, keńes, seminar, konferentsiialardy dástúrli sipatta ótkizýge ruqsat berildi.
Jalpy bilim beretin mektepterde 1-4 synyptar (halyqaralyq mektepterde 1-6 synyptar), oqýshy sany 600-den aspaityn bilim ordalarynda balalar shtattyq rejimde oqidy.
Oqýshy sany 600-den astam mektepterde jobalyq qýatynyń 50 paiyzynan aspaityn júktememen shtattyq rejimde bilim alady.
Mektepten tys uiymdar shtattyq rejimde jumys isteidi.
Kolledjder men joǵary oqý oryndarynyń stýdentterin oqytý aralas formatta: praktikalyq, zerthanalyq, seminar sabaqtary, óndiristik praktika – ikemdi keste boiynsha shtattyq rejimde, dárister – onlain.
Bilim berý uiymy ákimshiliginiń qalaýy boiynsha vaktsinatsiialaýdyń tolyq kýrsyn alǵan oqýshylardy shtattyq rejimde oqytýǵa jol beriledi.
Orta bilim berý uiymdarynda, kolledjderde, JOO-larda karantin rejimin buzý anyqtalǵan jaǵdaida bilim alýshylardyń barlyǵy qashyqtan oqytýǵa kóshiriledi.
«Ashyq»jobasyna qatysatyn nysandardy qospaǵanda, oiyn-saýyq, ujymdyq, otbasylyq, estelik is-sharalardy, onyń ishinde úide (banketter, úilený toilary, mereitoilar jáne t.b.) jáne adamdar kóp jinalatyn ózge de is-sharalardy ótkizýge jáne olarǵa qatysýǵa burynǵysha tyiym salynady.
Basqa da karantindik shekteý sharalary saqtalady.
Qaýly 28 qańtardan bastap kúshine endi.
