Batys Qazaqstan oblysynda sadaqaǵa barǵan aýyl muǵaliminen koronavirýs tabyldy, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindei, oqiǵa Aqjaiyq aýdany Býdarin aýylynda boldy.
Býdarin mektep-bóbekjai kesheniniń muǵalimi holetsistit aýrýymen dárigerge júgingen kezde onyń COVID-19 juqtyrǵany anyqtaldy. Sodan keiin muǵalim juqpaly aýrýlar aýrýhanasyna jatqyzyldy.
Ol osynyń aldynda Aqtóbe qalasyna sadaqaǵa baryp kelgen.
Úiinde jáne mektepte muǵalimmen qarym-qatynasta bolǵandardan alynǵan synama teris nátije, iaǵni koronavirýstyń joqtyǵyn kórsetti.
Aýdandyq bas memlekettik sanitar dárigeriniń qaýlysyna sáikes 9-11 synyp oqýshylary qashyqtan oqytýǵa, úi karantinine aýystyrylǵan.
Mektepte qorytyndy dezinfektsiia sharalary júrgizildi.
Oblysta osy kezge deiin 6975 adamnyń koronavirýs juqtyrǵany belgili bolyp, sonyń 6800-i jazylyp shyqty. Sonyń ishinde Oral qalasynda – dertke shaldyqqan 3813, Aqjaiyq aýdanynda – 345, Bókei ordasynda – 76, Bórlide – 752, Jańaqalada – 140, Jánibekte – 202, Báiterekte – 543, Qaztalovta – 233, Qaratóbede – 73, Syrymda – 239, Tasqalada – 101, Terektide – 326, Shyńǵyrlaýda 132 adam tirkeldi.
Indetten 117 adam kóz jumdy.
