Zelenov aýdany ortalyǵy Peremetnyi aýylynda aýdannyń ataýyn ózgertý jaiyn talqylaǵan jiyn ótti.
Kópshilik jergilikti qoǵamdastyq músheleriniń arasynan jiyn tóraǵasy etip Peremetnyi mektebiniń direktory Málik Óteshevti sailady.
El aldynda úlken bedelge ie Málik Sisenbaiuly ár turǵynnyń oi-pikiriniń mańyzdylyǵyna basymdyq berdi.
Aýdan ataýyn ózgertý máselesin talqylaýǵa jinalǵan qaýym ózindik oi-pikirlerin ortaǵa salyp, qorytyndysynda kópshilik aýdan ataýyn qazirgi zaman talabyna sai ózgertý qajettigin alǵa tartty.
Oǵan qosa, aýdandyq Dostyq úiinde aýdandyq máslihattyń bilim, densaýlyq saqtaý, áleýmettik, mádeni jáne jastar saiasaty, uiymdastyrý jáne quqyq máseleleri jónindegi turaqty komissiiasynyń Zelenov aýdanynyń ataýyn Báiterek aýdany dep qaita ataýǵa bailanysty kópshilik tyńdaý bolyp ótti. Tyńdalymǵa aýdan ákimi Ashat Shaharov, aýdandyq máslihat depýtattary, aýyldyq okrýg ákimderi, qoǵamdyq birlestikter ókilderi men turǵyndar qatysty.
- Biyl 11 qyrkúiekte aýdan ákimine aýdannyń «Jastyq-Molodost» jastar qoǵamdyq birlestigi atynan aýdan ataýyn zaman talabyna sai qaita qaraý týraly usynys tústi. Osyǵan bailanysty aýdan ákimi aýdandyq máslihat hatshysy Ramazan Ismaǵulovtyń atyna atalmysh másele boiynsha aýdandyq máslihattyń turaqty komissiiasynda kópshilik tyńdaý ótkizý týraly hat túsirgen. Osynyń negizinde aýdandyq máslihat 14 qyrkúiekte aýdandyq «Aýyl tynysy» gazetinde aýdandyq máslihattyń turaqty komissiiasynda kópshilik tyńdaý ótkizý týraly habarlama jariialady.
Joǵaryda aitylǵandai, 2018 jyldyń 22 qyrkúieginde aýdanymyzdyń barlyq aýyldyq okrýgterinde jergilikti qoǵamdastyq jinalystary ótti. Oǵan jergilikti qoǵamdastyq músheleriniń 331-i qatysyp, 295-i aýdandy Báiterek dep ataýdy usyndy.
Jergilikti qoǵamdastyq músheleriniń usynysyn búgingi máslihattyń turaqty komissiiasynda kópshilik tyńdaýǵa usynamyn, - dedi Zelenov aýdandyq mádeniet, tilderdi damytý, dene shynyqtyrý jáne sport bóliminiń basshysy Radik Yqylasov.
Atalmysh usynysty aýdandyq komissiia músheleri biraýyzdan maquldady.
Aita ketý kerek, aýdan ataýyn ózgertý Qazaqstan Respýblikasy «Ákimshilik-aýmaqtyq qurylysy týraly» Zańyna jáne «Ákimshilik aýmaqtyq birlikterge eldi mekenderdiń quramdas bólikterine ataý berý, olardy qaita ataý, sondai-aq olardyń ataýlarynyń transkriptsiiasyn naqtylaý men ózgertý kezinde tiisti aýmaq halqynyń pikirin eskerý qaǵidalaryn bekitý týraly» QR Úkimetiniń 2014 jylǵy №138 Qaýlysyna sáikes júzege asyrylýda.
Túgelbai BISEN,
Nurlybek QYDYRǴALIULY
zhaikpress.kz
