Batys Qazaqstan oblysynda órtsóndirýshiler Aqjaiyq aýdanyndaǵy Chapaev orman jáne janýarlar dúniesin qorǵaý memlekettik mekemesiniń aýmaǵynda shyqqan órtti úshinshi kún qatarynan sóndirip jatyr. Otqa oranǵan aýmaq 50 gektardan asady. Qutqarýshylarǵa kómekke tikushaq keldi, - dep habarlaidy Tengrinews.kz.
"15 gektar orman otqa orandy. Órt sóndirý jumystary jalǵasyp jatyr. Órtti sóndirýge órt sóndirý jáne avariialyq-qutqarý jumystary qyzmetinen 100-den asa adam, orman qyzmetkerleri men eriktiler jumyldyryldy", - dedi BQO TJD ókili.
Órtsóndirýshiler órtti sóndirý úshin kún saiyn jumys istep jatyr. Qazir kómekke "Qazaviaqutqarý" tikushaǵy keldi, dedi qutqarýshylar.
"Órt bastalǵannan beri jalpy aýdany 5,4 myń gektardan asa jerde 137 tabiǵi órt shyǵý oshaǵy anyqtaldy. 500 gektar alańda 12 dala órti jáne 17 orman órti shyqty", - dedi BQO TJD baspasóz qyzmetindegiler.
Órt saiajai turǵyndaryna ziian keltirgen. Svetlana Milehina jalǵyz baspanasynan aiyrylǵan.
"4 jáne 9 jastaǵy nemeremmen eki qabatty úide uiyqtap jatqanbyz. Kórshiler úi órtenip jatqanyn aityp, aiǵailaǵany estildi. Balalar, artynan men júgirip shyqtym. Bári janyp ketti, eshteńe qalmaǵan", - dedi áiel.
Qalalyq baǵbandar qoǵamy sońǵy kúnderi Oral mańynda órt birneshe baqsha seriktestikterine ziian keltirgenin aitty.
"Saiajaida úiler órtenip, seriktestikter infraqurylymy búlingen. Ótemaqy máselesin sheshý óte qiyn. Kóp adamnyń ǵimaraty tirkelmegen", - dedi qoǵam tóraǵasy Andrei Zaozerov.
Aita keteiik, BQO-da eki apta boiy 40 gradýstan joǵary aptap aýa raiy saqtalyp tur.
