Batys Qazaqstan oblysynyń Qaztalov aýdanynda brakoner 30 dana kiik múiizimen ustaldy. Bul týraly aýdandyq politsiia bóliminen málim etti, dep habarlaidy "Ult aqparat".
12 mamyr kúni aýdandyq politsiia bóliminiń bastyǵy Renat Degenbaevtyń qatysýymen júrgizilgen jedel izdestirý sharasy barysynda Qaztalov aýylyna qarasty dalalyq jerden kúdik týdyrǵan «Toyota Land Cruiser» avtokóligi toqtatylǵan.
Avtokólik júrgizýshisi oqiǵa ornynan boi tasalap úlgergen. Júrgizýshimen birge bolǵan azamat qolǵa túsip, onyń Qaztalov aýdanyna qarasty Jalpaqtal aýylynyń turǵyny ekeni anyqtaldy. Odan avtokólikpen qosa 30 dana kiik múiizi, bir ańshylyq qarý jáne oq-dáriler tárkilendi.
Oqiǵa ornynda ustalǵan kúdiktige qatysty QR QK 337-baby 4-bóligi 2-tarmaǵyna sáikes qylmystyq is qozǵalyp, tergeý amaldary júrgizilýde.
Eske sala keteiik, budan buryn batysqazaqstandyq turǵynnyń 366 dana kiik múiizimen qolǵa túskenin jazǵan bolatynbyz.
