Foto: IIM
Batys Qazaqstan oblysynda Bórli aýdandyq soty Qylmystyq kodekstiń 115-1-babynda kózdelgen zańsyz qýdalaý deregi boiynsha úkim shyǵardy, dep habarlaidy BQO sotynyń baspasóz qyzmeti.
Belgili bolǵanyndai, sottalýshy D. óz áreketteriniń zańsyz ekenin bile tura, jábirlenýshi E-ge 2025 jylǵy 20 qyrkúiekten 2026 jylǵy 23 qańtarǵa deiingi aralyqta júieli túrde zańsyz qýdalaý jasaǵan.
Atap aitqanda, birneshe ret telefon soǵyp, habarlamalar jibergen, sonyń ishinde qorqytý sipatyndaǵy habarlamalar joldaǵan. Jábirlenýshiniń turǵylyqty jáne jumys ornyna baryp, sol jerlerde ańdyp kútken.
2026 jylǵy 23 qańtarda sottalýshy mas kúiinde dúkennen shyqqan jábirlenýshini ańdyp, onyń erkinen tys qolynan ustap, qardyń ústine qulatqan. Sol sátte áriptesteri kómek kórsetip, sottalýshyny qýyp jibergen.
Qylmystyq isti qaraý barysynda sottalýshy kinásin tolyq moiyndady. Prokýror sottalýshyǵa 80 saǵat qoǵamdyq jumys taǵaiyndaýdy surady, al jábirlenýshi jazany sottyń qalaýyna qaldyrdy.
Er adamnyń áreketteri jábirlenýshige eleýli ziian keltirgen zańsyz qýdalaý retinde saralandy.
Sot sottalýshynyń áreketteri uzaq ýaqytqa sozylǵanyn, Qazaqstan Respýblikasy Konstitýtsiiasymen kepildik berilgen jeke adamnyń negizgi bostandyqtaryna qol suqqanyn atap ótip, is boiynsha jinalǵan dáleldemelerdiń jiyntyǵy negizinde ony kináli dep tanydy.
Nátijesinde sottalýshy D-ǵa 80 ailyq eseptik kórsetkish mólsherinde, iaǵni 346 myń teńge kóleminde aiyppul túrindegi jaza taǵaiyndaldy. Sot úkimi zańdy kúshine engen joq, - dep habarlady vedomstvodan.
Eske sala keteiik, budan buryn Batys Qazaqstanda stalking jasaǵan 2 adamnyń sottalǵanyn jazǵan edik.
