Batys Qazaqstan oblysy Bókei ordasy aýdanynyń Saiqyn aýylynda Ekinshi dúniejúzilik soǵys kezinde qaza tapqan 15 jaýyngerdiń súiegi qaita jerlendi, dep habarlaidy "Ult aqparat".
Sarbazdar súiekteri biyl jazda Saiqyn aýyly mańyndaǵy Ravninnyi razezinde izdestirý jumystary kezinde tabylǵan edi.
On bes jaýyngerdiń súiegi 2 qazan kúni 196-Qyzyl týly Gatchinsk atqyshtar diviziiasynyń baýyrlastar ziratynda jer qoinyna tapsyryldy.
Qazý jumystaryn júrgizgen Tasqala aýdany Merei aýylynda turatyn M.Mámetova atyndaǵy izdestirý jasaǵynyń komandiri Sergei Lapshinniń aitýynsha, kitel túimelerinde zákir belgilengendikten, bozdaqtardyń teńizshiler ekendigi anyqtaldy. Biraq medalondary bolmaǵandyqtan, dál kim ekendigin aiyrý ázirge múmkin emes.
Aýdandyq bilim berý bóliminiń basshysy Juban Ǵumarovtyń sózine qaraǵanda, bul jaýyngerler 1942 jyly Stalingrad maidanyna kómekke jiberilgen 74-teńiz atqyshtar briadasynyń sarbazdary dep aitýǵa bolady. Bomba túsip, dál osy jerde qaza tapqan 37 jaýyngerdiń tizimi belgili. Shamamen 18-22 jas aralyǵyndaǵy 15 bozdaq ta solardyń ishinde. Bolashaqta olardyń aty-jónin anyqtap, eskertkish taqta ornatý, sonymen qatar qazba jumystaryn jalǵastyrý kózdelýde.
2 qazan sondai-aq Bókei ordasy aýdanynan túlep ushqan Keńes Odaǵynyń Batyry Mánshúk Mámetovanyń týǵan kúni bolǵandyqtan, onyń eskertkishine gúl shoqtary qoiyldy.
«Mánshúk apamyz nebári 21 jasynda qaza tapsa, 15 jaýynger de onyń turǵylastary edi. Osyndai órimdei jastardyń eldi qorǵaý jolynda jan bergenin biz, keiingi urpaq umytýǵa tiisti emespiz. Stalingrad maidany tiip turǵandyqtan, bizdiń aýdan soǵys jaǵdaiynda dep jariialandy. Jaý temirjol boiyn úzdiksiz bombalap jatty, jaýyngerlermen qatar turǵyndar da oqqa ushty. Aldaǵy jyly Jeńiske 75 jyl tolady. Osy oraida aǵa býyn erligi máńgi úlgi bolyp qala bermek», - dedi aýdan ákimi Nurlan Rahymjanov.
