Batys Qazaqstan oblysynda pravoslav hristiandarynyń Shoqyný meiramy kezinde sýǵa túsetin arnaiy oryndar belgilendi, dep habarlaidy "Ult aqparat".
BQO Tótenshe jaǵdailar departamenti Tótenshe jaǵdailardy joiý basqarmasynyń bastyǵy Baqytjan Ihsanovtyń málim etkenindei, mereke kúni turǵyndardyń qaýipsizdigin qamtamasyz etý mańyzdy.
Osy oraida oblysta sýǵa túsetin arnaiy 31 oryn belgilense, sonyń 14-i Oral qalasynda ornalasqan.
Onyń sózine qaraǵanda, sý aidyndarynda muzdyń qalyńdyǵy ártúrli (16-dan 36 sm-ǵa deiin). Sondyqtan BQO TJ departamenti jergilikti eparhiiaǵa sýǵa túsetin oryndardy jabdyqtaý (tutqasy, joly bar aǵash baspaldaq ornatýmen birge biiktigi keminde 20 santimetr brýstver, sondai-aq jaǵalaýda nemese oǵan jaqyn jerde kiim aýystyratyn oryndar ázirleý) týraly usynys engizdi.
«Atalǵan oryndarda TJ departamentinen 78 qyzmetker 10 tehnikamen kezekshilikte bolady. Politsiia departamentimen jáne oblystyq densaýlyq saqtaý basqarmasymen birlesip atqarylatyn jumystar pysyqtaldy. Barlyq is-sharalar kezinde koronavirýstyń taralýyna jol bermeý maqsatynda karantindik talaptar tolyq oryndalýy tiis»,- dedi B.Ihsanov.
BQO Sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń aitýynsha, sýǵa túsetin orynda adamdar sany onnan aspaýy jáne araqashyqtyq saqtalýy kerek. Sondai-aq turǵyndarǵa shomylmai-aq sýdy ózimen alyp ketip, dini rásimdi úide oryndaý usynylady. Ásirese, adamdar ózin jaisyz sezinse, sýǵa túspegeni jón.
