Batys kólik politsiiasynyń qyzmetkeri bosanǵaly jatqan júkti áieldi aýrýhanaǵa jetkizip, qutqaryp qaldy, dep habarlaidy QazAqparat.
QR IIM Kóliktegi politsiia departamentiniń baspasóz qyzmetinen túsken málimetke qaraǵanda, oqiǵa 6 aqpan kúni Qazaqstan stantsiiasynan (Aqsai qalasy) 3-4 shaqyrym jerde boldy.
Aiza Joldaspaeva kúieýi Nurbolmen birge Oral-Almaty jolaýshylar poiyzymen Aqtóbege bara jatqan. Alaida Qazaqstan stantsiiasynan shyqqannan keiin 8 ailyq júktiligi bar 38 jastaǵy áielden qan ketip, jaǵdaiy kúrt nasharlaǵan. Poiyz sol boida toqtap, mashinist-dispetcher shuǵyl kómek kerektigin habarlaǵan.
Oqiǵa ornyna Qazaqstan stantsiiasyndaǵy jelilik politsiia bóliminiń bastyǵy Muqatai Aiapov birinshi bolyp jetken. Poiyz dalada turǵandyqtan, oǵan jedel járdem kóligi jete almaityn edi.
Politsiia podpolkovnigi Muqatai Aiapov kúrtik qarǵa qaramastan, áieldi kóterip alyp shyǵyp, avtokóligimen Bórli aýdandyq ortalyq aýrýhanasyna jetkizgen. Aýrýhanada áielge kesar tiligimen ota jasalyp, dúniege qyz bala keldi.
Nurbol Joldaspaev qazirgi kezde áieli men qyzynyń jaǵdaiy jaqsy ekendigin aityp, kólik politsiiasy qyzmetkerine alǵysyn bildirdi.
