Jáńgir han atyndaǵy Batys Qazaqstan agrarlyq-tehnikalyq ýniversitetiniń synaý ortalyǵynda biotehnologiia jáne juqpaly aýrýlardy diagnostikalaý zerthanasy ashyldy, dep habarlaidy "Ult aqparat".
Jańa zerthana túrli juqpaly aýrýlardy, sonyń ishinde koronavirýs indetin tereńirek zertteýge múmkindik beredi.
Ýniversitet rektory Asqar Nametovtiń málim etkenindei, zerthana joǵary patogendi aýrýlardy zertteýge ruqsat alǵan. Jumysty tiisti deńgeide júrgizý úshin ýniversitet ǵalymdary men mamandary AQSh-ta biliktilikterin jetildirip qaitty.
Kelisimshart boiynsha zerthanaǵa qajetti biomaterialdardy «Mediker» meditsinalyq ortalyǵy jetkizedi. Zerthanada 6 qyzmetker eńbek etedi. Osy kezge deiin zerthana ǵalymdary COVID-19-ǵa 500-den astam taldaý jasap úlgergen. Aldaǵy ýaqytta munyń sany kóbeie túspekshi. Óitkeni AQSh pen Qytaidan ákelingen arnaiy qurylǵylar synamalardy avtomatty túrde jedel anyqtaidy.
Zerthanada sonymen qatar basqa da zertteýler qolǵa alynbaq.
«Jarqanat – koronavirýs indetiniń taralýynyń negizgi oshaǵy retinde qarastyrylyp otyrǵany belgili. Alaida Qazaqstandaǵy jarqanat áli zerttelmegen. Sol sebepti Otar ǵylymi zertteý institýtymen birlese otyryp, zertteý jumystaryn qolǵa aldyq. Jarqanattyń juqpaly aýrýlardy taratýǵa qanshalyqty sebepker ekendigin anyqtasaq, bul meditsinamyzǵa da, veterinariia salasyna da úlken qoldaý bolmaq. Mal aýrýlarynyń arasynda koronavirýstyń ózge túrleriniń bar ekeni anyq. Endi COVID-19-dyń malǵa qanshalyqty áser etetindigin zertteitin bolamyz. Qytai qazirgi tańda Qazaqstannan jetkiziletin iri qara mal etiniń koronavirýstan taza ekendigin rastaityn sertifikat talap ete bastady. Ýniversitet ǵalymdary zamanaýi tehnologiianyń arqasynda maldyń aýrýdan ada ekendigin anyqtaýda. Buǵan deiin Qazaqstanda mundai taldaýlar jasalǵan joq. Ázirge elimiz boiynsha iri qara maldaǵy COVID-19-dy anyqtaityn jalǵyz ýniversitetpiz», - dedi A.Nametov.
Kez kelgen patogendi juqpa sekildi COVID-19 da mýtatsiialanady. Sondyqtan ýniversitet ǵalymdary zertteý jumystaryn júieli júrgizýdi maqsat etip otyr.
