2020 jyldyń mamyr aiynda Batys Qazaqstan oblysy boiynsha Memlekettik kirister departamenti eksporttyq baqylaý qyzmetkerleri «Syrym» avtomobil ótkizý pýnktinde memlekettik shekaradan ótip bara jatqan kezde 10-nan astam ataýy bar deklaratsiialanbaǵan taýar salynǵan 15 júk kóligin ustady, dep habarlaidy QazAqparat.
Almatydan Reseidiń Penza oblysyna baǵyt alǵan «SERTTRANS» JShS-ne tiesili taýar quny 1 mlrd 003 mln teńge, sl salmaǵy 263 000 keli boldy.
Júk kólikterin tekserý kezinde taýarlyq-ilespe qujattarynsyz áketýge tyiym salynǵan qosymsha dárilik zattar, antiseptikter, jeke qorǵaný quraldary da tabyldy.
Budan basqa, tasymaldaýshy halyqaralyq úlgidegi CMR taýar – kólik júk qujattaryn usyndy, onda júkti jóneltýshi «SERTTRANS» JShS bolyp kórsetilgen.
Is júrgizý barysynda «SERTTRANS» JShS-niń ustalǵan taýarǵa qatysy joq ekeni anyqtaldy, sonymen qatar atalǵan zańdy tulǵany memlekettik tirkeý jaramsyz dep tanyldy.
«Alaida, úshinshi tulǵalar tarapynan jasalǵan tasymaldaý sharty men satyp alý-satý shartynyń bolýyn ýájdei otyryp, ustalǵan taýarǵa menshik quqyǵyn málimdeý áreketi júzege asyryldy.
Osyǵan bailanysty, BQO jáne Almaty qalasy boiynsha Memlekettik kirister departamentteri birlesip atalǵan sharttardy jaramsyz dep tanydy, sot aktileri zańdy kúshine endi.
Budan ári, Departament úshinshi tulǵalardyń sot aktileri negizinde oryn alǵan talaptardy alyp tastai otyryp, Oral qalasynyń №2 sotyna ustalǵan taýardy iesiz dep taný jáne ony memleket kirisine ainaldyrý týraly ótinishpen júgindi.
Sottyń 2022 jylǵy 22 aqpandaǵy sheshimimen Departamenttiń málimdelgen talaptary tolyq kólemde qanaǵattandyryldy. Sheshim zańdy kúshine engen joq»,-delingen habarlamada.
