Batys Qazaqstan oblysynda koronavirýstan kóz jumǵan 79 jastaǵy keiýana úiinde ózdiginen emdelgen, dep habarlaidy "Ult aqparat".
Oblystyq densaýlyq saqtaý basqarmasynyń baspasóz qyzmeti málim etkenindei, 1941 jylǵy turǵyn 22 mamyr kúni aýyrǵan. Álsizdik paida bolyp, qyzýy 38 gradýsqa deiin kóterilip, úide ózdiginen emdelgen, dárigerge qaralmaǵan.
Jaǵdaiy nasharlaǵannan keiin 25 mamyr kúni ýchaskelik dárigerge júgingen. 27 mamyr kúni saǵat 00.40-ta aýyr halde oblystyq juqpaly aýrýlar aýrýhanasynyń jansaqtaý bólimine túsken. Marqum 7 maýsym kúni saǵat 17.30-da qaitys boldy.
Diagnozy: aýyr jaǵdaida órbigen koronavirýs juqpasy. Ekijaqty polisegmentti pnevmoniia. Sondai-aq qosymsha basqa da aýrýlary asqynyp ketken.
Osylaisha BQO-da koronavirýstan kóz jumǵandar sany 3-ke jetti. Keshe elimizde osy infektsiiadan alty naýqas qaitys bolǵan edi.
