Batys Qazaqstan oblysynda koronavirýs juqtyrǵan 40 naýqas jansaqtaý bóliminde jatyr, dep habarlaidy QazAqparat.
BQO densaýlyq saqtaý basqarmasy basshysynyń mindetin atqarýshy Arman Qalibekovtiń óńirlik kommýnikatsiialar qyzmeti alańynda ótken brifingide málim etkenindei, qazirgi kezde 94 tósektik jansaqtaý bólimsheleri 42,5 paiyzǵa tolǵan.
Arman Qalibekovtiń sózine qaraǵanda, sonyń ishinde 35 naýqas aýyr, beseýi asa aýyr halde. 5 adam invazivti jasandy tynys alý apparatyna, 25-i invazivti emes osyndai qurylǵyǵa qosylǵan. 36 naýqastyń 28-i júrek-qan tamyrlary aýrýlaryna, 8-i qant diabetine shaldyqqan.
Oblys boiynsha pandemiia bastalǵannan beri tirkelgen 36 544 naýqastyń 28 652-si (78,4 paiyzy) jazylyp shyqty. 717, sonyń ishinde biyl jyl basynan beri 548 adam ómirden ótti.
Sońǵy táýlikte oblystyq jedel járdem stansasyna barlyǵy 836 qońyraý shalynsa, sonyń 105-i KVI-men bailanysty boldy, 29 adam statsionarǵa jatqyzyldy.
Kúni búgin 1 177 naýqas ambýlatoriiada emdelip jatyr. Al 1 059 tósektik 19 infektsiialyq statsionar 39,8 paiyzǵa tolǵan. Aýyrǵandardyń deni vaktsina almaǵan turǵyndar bolyp otyr.
«Búginde qala jáne aýdan emhanalarynda «Spýtnik V», QazVac, Vero Cell vaktsinalary jetkilikti kólemde bar. Osy kezge deiin 214 484 adam vaktsinanyń birinshi, 184 311-i ekinshi komponentimen egildi. Emhanalarda aptanyń barlyq kúnderi tańǵy 08.00-den keshki 20.00-ge deiin egý kabinetteri jumys jasaidy. Aýdandarda jáne Oraldaǵy temirjol vokzaly janynda kóshpeli meditsinalyq keshen vaktsina jasaýǵa shyǵyp turady. Osy aptada ortalyq bazar aýdanynda taǵy bir jyljymaly meditsinalyq keshen shyǵardyq», - dedi Qalibekov.
