Batys Qazaqstan oblysynda koronavirýs juqtyrǵan 2415 naýqas ambýlatorlyq em qabyldap jatyr, dep habarlaidy "Ult aqparat".
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnikatsiialar qyzmeti alańynda málim etkenindei, olardyń 66,8 paiyzynyń aýrýy jeńil ótýde. 13,6 paiyzynyń jaǵdaiy ortasha aýyr. 19,6 paiyzy – simptomy joqtar.
Oblystyq jedel járdem stansasyna sońǵy táýlikte barlyǵy 1115 qońyraý shalyndy, sonyń ishinde KVI boiynsha – 181, statsionarlarǵa jatqyzylǵandar sany – 50.
Gúlnár Maqsotqyzynyń sózine qaraǵanda, qazirgi tańda 1459 tósektik 20 infektsiialq statsionarda (onyń altaýy qalada, qalǵany aýdandarda) barlyǵy 667 adam emdelýde. Sonyń ishinde 109 tósektik jansaqtaý bólimshelerinde 53 naýqas jatyr. Bulardyń ishinde 50-i aýyr, úsheýi asa aýyr halde. 50,9 paiyzy – ilespeli patologiiasy bar 60 jastan asqandar. 40 naýqastyń sozylmaly derti bar, 29-y júrek-qan tamyrlary aýrýlaryna, 11-i qant diabetine shaldyqqan.
Invazivti jasandy tynys alý apparatyna 1, invazivti emes osyndai qurylǵyǵa 31, ottegi kontsentratoryna 18 naýqas qosylǵan.
«Infektsiialyq statsionarlarda jatqandardyń 98 paiyzdan astamy vaktsina almaǵan. Al jansaqtaý bólimshesindegiler túgeldei egilmegen», dedi G.Ábdirahmanova.
Kúni búginge deiin oblysta 181 491 adam vaktsinanyń birinshi, 138 911-i ekinshi komponentimen egilgen.
Indet bastalǵannan beri koronavirýs juqtyrǵan 32 844 naýqastyń 25 084-i nemese 76,3 paiyzy jazylyp shyqty. 606 adam kóz jumdy.
