Batys Qazaqstan oblysynda qarasha aiynda 355 adam koronavirýstan emdelip shyqty, dep habarlaidy "Ult aqparat".
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnikatsiialar qyzmeti alańynda ótken brifingide málim etkenindei, oblysta osy kezge deiin 7 912 adam indet juqtyrdy. Kúni búgin sonyń 7 188-i nemese 90,8 paiyzy jazylyp shyqty. Osynyń 3 329-y statsionarda emdelse, 3859-y ambýlatoriiada qabyldady.
Indet saldarynan 131 adam kóz jumdy.
G.Ábdirahmanovanyń sózine qaraǵanda, qazirgi tańda 185 tósektik 4 karantin statsionarynda 46 adam jatyr. Al 359 tósektik 7 infektsiialyq statsionarda 126 adam emdelýde.
Sonyń ishinde 10-y jansaqtaý bólimshesinde. Bulardyń ekeýi 40 pen 60, altaýy 60 pen 80 jas aralyǵyndaǵylar bolsa, qalǵan ekeýi – seksennen asqandar. Báriniń de qosymsha sozylmaly syrqattary bar, 9-y júrek-qan tamyrlary, bireýi qant diabetine shaldyqqan.
Sol sekildi invazivti emes ókpeni jasandy jeldetý apparatyna 5, ottegi kontsentratoryna 9 naýqas qosylǵan.
«Jalpy, oblys boiynsha meditsinalyq uiymdar 195 ókpeni jasandy jeldetý apparaty, 645 ottegi kontsentratory, 1 063 oksimetr, 198 ottegi kózi, 425 Bobrov apparatymen qamtamasyz etilgen. 7 tsifrlyq rentgen apparaty satyp alynyp, kovidti pnevmoniiany diagnostikalaý úshin aýdandyq aýrýhanalarǵa jetkizildi», dedi G.Ábdirahmanova.
