Batys Qazaqstan oblysynda karantin tártibin buzǵandarǵa 20 mln astam teńge aiyppul salyndy, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetinen túsken málimetke qaraǵanda, 5 shilde – 5 tamyz aralyǵynda karantin rejimi men sanitarlyq-epidemiologiialyq talaptardy buzǵandarǵa qatysty 311 hattama toltyryldy.
Bulardyń ishinde zańdy jáne jeke tulǵalar, sondai-aq kásipkerler de bar.
Monitoringtik top pen politsiia júrgizgen reidter barysynda karantin kezinde tyiym salynǵan saýda, qyzmet oryndarynyń jumys istep turǵany anyqtaldy. Birqatar kásipkerlik nysandarynda sanitarlyq talaptardyń saqtalmaǵany, atap aitqanda, jeke qorǵanysh quraldary men dezinfektsiialyq quraldardyń (antiseptikterdiń) joqtyǵy belgili boldy.
Sonymen qatar shekteý sharalaryna qaramastan, turǵyndar úide, kafe, meiramhanalarda kóp adamnyń jinalýymen otbasylyq sharalar ótkizgen. Túngi saǵat 23.00-den keiin jeke kóligimen beisaýat júrgender de aiypsyz qalmady.
Departament koronavirýs indetiniń qaita órship ketpeýi úshin karantindik shekteý sharalaryn qatań saqtaýǵa shaqyrady.
