Batys Qazaqstan oblysynda it qapqan turǵyndar sany artyp otyr, dep habarlaidy QazAqparat.
BQO sanitarlyq-epidemiologiialyq baqylaý departamentiniń basshysy Muhamǵali Aryspaev málim etkenindei, biylǵy úsh aida qutyrma indeti boiynsha jaǵdai turaqty bolǵanymen, it qaýyp, zardap shekkender sany ótken jylǵy osy kezeńmen salystyrǵanda, 3 paiyzǵa artqan.
Onyń aitýynsha, jyl basynan bergi úsh aida janýarlardyń tisteýi saldarynan 384 adam antirabiialyq kómekti qajet etken. Sonyń ishinde 73,4 paiyzy itten, 21 paiyzy mysyqtan, 3,1 paiyzy ózge úi janýarlarynan zardap shekken.
Departament basshysynyń sózine qaraǵanda, itterdiń joiylmaýy, degelmintizatsiialaý sharalarynyń tolyq atqarylmaýy saldarynan turǵyndar arasynda parazittik aýrýlar da órship otyr. Sonyń ishinde ehinokokkoz aýrýy kóbeiýde. Ehinokokkozdyń negizgi kózi – itterge tekserýdiń durys júrgizilmeýi. Buralqy itter parazit kózi (tasymaldaýshysy) bolýy jáne olarmen tikelei qatynas kezinde adam aýrý juqtyrýy múmkin. 2021 jyly 8058 it, 339 mysyq aýlansa, biylǵy birinshi toqsanda 1150 it qana «torǵa túsken».
«Oblys boiynsha epidemiologiialyq jaǵdai salystyrmaly túrde turaqty bolǵanymen, rotavirýsty enterit 9,3 ese (3-ten 28-ge), jelsheshek 4,9 ese (183-ten 906-ǵa), qyzamyq 3,9 ese (41-ten 160-qa), salmonellez 2 ese (6-dan 12-ge), dermatomikoz 2 ese (8-den 16-ǵa), askaridoz 2 ese (4-ten 8-ge) jedel respiratorly virýsty infektsiia 1,7 ese (11 740-tan 20 940-qa), sozylmaly V virýsty gepatiti 1,6 ese (8-den 13-ke), koronavirýs 1,6 ese (5925-ten 9584-ke), jiti ishek infektsiiasy 1,5 ese (17-den 26-ǵa), sozylmaly S virýsty gepatiti 1,3 ese (16-da 22-ge) kóbeiip otyr.
Qazirgi tańda karantindik shekteý sharalarynyń alynyp tastalýyna bailanysty barlyq nysandar qalypty jumys jasaýda. Osyǵan orai salmonellez, jedel ishek juqpalary, dizenteriia, basqa infektsiialar ósýi múmkin degen boljam bar», - dedi M.Aryspaev.
