Batys Qazaqstan oblysy densaýlyq saqtaý basqarmasynyń jetekshisi Bolatbek Qaiypov paraqorlyq baby boiynsha kúdikke ilinip, ustaldy. Qazaqstannyń batys óńirinen aqparat taratatyn "Moi gorod" saity 29 qazanda osylai dep habarlady. Ázirge tolyq emes derek boiynsha, sheneýnik 7 mln teńge kóleminde para aldy degen kúdikke ilingen. Oblystyń bas dárigeri ýaqytsha qamaý izoliatoryna qamaldy dep aitylady.
"Moi gorod" saitynyń jazýynsha, Qaiypovqa qatysty tergeý amaldary bastalǵany jaily aqparat osyǵan deiin de taraǵan. Alaida qyrkúiek aiynyń basynda oblystyq densaýlyq saqtaý basqarmasy aqparatty joqqa shyǵarǵan. Degenmen basqarma qadaǵalaý organdarynyń koronavirýspen kúreske baǵyttalǵan sharalarǵa qarjy jumsaý máselesin tekserip jatqanyn rastaǵan.
29 qazanda Batys Qazaqstan oblysynyń densaýlyq saqtaý basqarmasynyń baspasóz qyzmeti Qaiypovtyń ustalǵany jaily aqparattan habarsyz ekenin jetkizgen. Al sheneýnik ornynda joq bolyp shyqqan. Batys Qazaqstan oblysynyń jemqorlyqqa qarsy is-qimyl kúres qyzmeti de ázirge túsinikteme bermei otyr.
Osyǵan deiin densaýlyq saqtaý vitse-ministri Oljas Ábishev "qarajatty ysyrap etý" baby boiynsha kúdikke ilinip, ustalǵan edi. Aqparat boiynsha, tergeý organdary sheneýnikti "aqparattyq júie qurýǵa bólingen 500 million teńgeden astam qarajatty ysyrap qaldy" dep aiyptap otyr. Qyrkúiek aiynyń sońynda bul is boiynsha tergeý amaldarynyń jalǵasyp jatqany habarlandy.
Elde koronavirýs indeti órship, densaýlyq saqtaý salasyna syn kóbeigen shaqta aimaqtaǵy densaýlyq saqtaý basqarmasy mamandary da jii aýysyp jatyr. Osyǵan deiin Almaty qalasynyń densaýlyq saqtaý basqarmasynyń jetekshisi Kamaljan Nádirov qyzmetinen ketken.
