Batys Qazaqstan oblysynda 2026 jyly atalyp ótiletin Bókei handyǵynyń 225 jyldyǵyna orai daiyndyq is-sharalary bastaldy, dep habarlaidy QazAqparat.
Oblys ákimi Ǵali Esqalievtiń BAQ ókilderimen kezdesýinde málim etkenindei, Bókei ordasy aýdanyndaǵy Han ordasy mýzei-qoryǵy – elimizdegi kieli oryndardyń biri.
1801 jyly Bókei sultan qaramaǵyndaǵy elmen Edil men Jaiyq aralyǵyna ótse, 1826 jyly Jáńgir Han ordasynyń negizin qalaǵany málim.
QazAqparat tilshisiniń saýalyna jaýap bergen óńir basshysynyń aitýynsha, tarihi oryndardy jańǵyrtý jumystaryn jalǵastyrýmen qatar týristerdiń Han ordasyna qysy-jazy baryp turýy úshin jaǵdai da jasalýy qajet. Osy maqsatta qazirgi ýaqytta Bókei ordasy aýdany baǵytynda qurylysy júrip jatqan respýblikalyq joldan Han ordasyna qarai uzyndyǵy 25 shaqyrym kirme jol da salynady.
BQO ákiminiń orynbasary Baqytjan Narymbetovtiń tolyqtyrǵanyndai, Han ordasy mýzei-qoryǵynda biyl «Qarashyǵanaq Petroliým Opereiting b.v.» kompaniiasynyń áleýmettik investitsiiasy esebinen vizit ortalyǵy men ákimshilik ortalyǵy qurylysy bastalady. Buǵan 413 mln teńge qaralǵan.
Onyń sózine qaraǵanda, qazirgi tańda mýzei qyzmetkerleri tarihi ǵimarattardyń ishinde otyr. Sondyqtan qyzmet aiasyn keńeitip, sharýashylyq jumystaryn uiymdastyrý úshin atalǵan nysandar boi kóteredi. Sonymen qatar oblys ákimdiginen Qazaqstan Mádeniet jáne sport ministrligine 2023-2025 jyldarǵa úsh jyldyq biýdjetke engizý úshin tarihi nysandardy qaita jańǵyrtý maqsatynda usynystar berildi. Oral qalasyndaǵy kóne ǵimarattardy qosqanda, buǵan 1 mlrd astam teńge kerek.
Han ordasy aýyly mańyndaǵy Jáńgir han, dáýlesker kúishi Dáýletkerei, qazaqtyń tuńǵysh ǵalymdarynyń biri Muhamed-Salyq Babajanovtar jerlengen panteon eskirgen, bul da qaita jóndeledi.
«Bókei handyǵynyń 225 jyldyǵyna orai halyqaralyq deńgeide ǵylymi-praktikalyq konferentsiia uiymdastyrý josparlanyp otyr. Oǵan qosa oiyn-saýyq, dala qyzyqtary, mádeni-sporttyq sharalar mindetti túrde ótedi. Oral qalasynda Bókei hanǵa eskertkish ornatyla ma? degen saýalǵa orai aitarymyz, eger turǵyndar, ziialy qaýym ókilderi tarapynan naqty usynystar tússe, qarastyratyn bolamyz», - dedi Narymbetov.
