Batys Qazaqstan oblysynda birneshe turǵyn esirtki zattarymen ustaldy, dep habarlaidy "Ult aqparat".
BQO politsiia departamentiniń baspasóz qyzmetinen túsken málimetke qaraǵanda, jedel izdestirý sharalary barysynda Oral qalasynyń 1994 jáne 1983 jylǵy turǵyndary qolǵa tústi.
Olardan sur-jasyl tústi esirtki zaty salynǵan 13 sirińke qoraby jáne tuz túrindegi sintetikalyq esirtki bar eki qaǵaz orama tárkilendi.
Qazirgi kezde atalǵan derek boiynsha Oral qalasy politsiia basqarmasy QR QK 296-baby 4-bóligine (esirtki zattarymen ótkizý maqsatynsyz zańsyz ainalysý) sáikes tergeý amaldaryn júrgizýde.
Sol sekildi Báiterek aýdanynyń 1972 jylǵy turǵynynyń mekenjaiynan esirtki zaty salynǵan qaǵaz orama, 1,5 jáne 0,5 litrlik eki plastikalyq quty, kóknár dánderi salynǵan paket, 3 ósimdik butasy tabyldy. Sharýashylyq aýlasynan da osyndai zattar tárkilendi.
Bul derek boiynsha Priýral politsiia bólimi QR QK 296-baby 4-bóligine jáne 300-baby 1-bóligine (quramynda esirtki zattar bar, ósirýge tyiym salynǵan ósimdikterdi zańsyz egip-ósirý) sáikes tergeýdi bastady.
BQO politsiia departamenti esirtki qylmysyna qarsy is-qimyl basqarmasynyń bastyǵy Álisher Sarynyń aitýynsha, biylǵy úsh aida 27 esirtki qylmysy ashylsa, sonyń 12-si ótkizýge qatysty.
Esirtkiniń zańsyz ainalymyna bailanysty 20 adam ustalsa, sonyń beseýi esirtki satqan.
Barlyǵy 7 kg 642 gramm esirtki men psihtroptyq zattar tárkilense, sonyń ishinde 7 kg 627 gramm – marihýana, 7,35 gramm – gashish, 1,4302 gramm – ekstraktsiialyq apiyn, 5,86 gramm – sintetikalyq esirtkiler.
Sondai-aq 45 qylmystyq quqyqbuzýshylyqtyń beti ashylsa, sonyń 44-i – QR QK 296-babynyń 1-2 bólimderine, bireýi – 303-baptyń 1-bólimine qatysty.
