Batys Qazaqstan oblysynyń Tasqala aýdanynda birqatar mekteptiń ataýy qazaqylandy.
«Bul ózgeris ideologiialyq turǵydan eskirgen ataýlar men qaitalanatyn ataýlardy tarihi jer-sý ataýlaryna almastyrý aiasynda júrgizildi» deidi oblystyq tilderdi damytý basqarmasynyń basshysy Aigúl Myńbaeva.
Qazaqstan Respýblikasy Úkimetiniń 2018 jylǵy 9 shildede shyqqan №413 qaýlysyna orai Tasqala aýdanyndaǵy Vavilin bastaýysh mektebi – Bastaý, Jemshin bastaýysh mektebi – Toǵaily, Krýtoi negizgi mektebi – Yntymaq, Kýznetsov negizgi mektebi – Birlik, Rodnik negizgi mektebi – Ainabulaq, Semiglavyi Mar orta mektebi – Dostyq, Sovhoz mektep-balabaqshasy – Atameken, Shipov orta mektebi – Merei orta mektebi bolyp qaita atalatyn boldy.
Osylaisha, shekarada jatqan eldimekenderdiń qazaqy bet-beinesi qalpyna kelip, aldaǵy jańa oqý jylynda shákirtter ataýy jańǵyrǵan mektep tabaldyryǵyn attaityn boldy.
Qazbek QUTTYMURATULY,
«Egemen Qazaqstan» gazeti
