Batys Qazaqstan oblysynda balany urǵan mektep direktoryna qatysty úkim shyqty, dep habarlaidy "Ult aqparat".
BQO sotynyń baspasóz qyzmeti málim etkenindei, oqiǵa aýdandardyń birindegi mektep direktorynyń qabyldaý bólmesinde bolǵan.
Kezekshi muǵalim sol jerge tártip buzǵan M. esimdi 11-synyp oqýshysyn shaqyrǵan. A. esimdi mektep direktory kezekshi muǵalimniń kózinshe jasóspirimniń betine, denesine birneshe soqqy jasap, jeńil dene jaraqatyn keltirgen.
BQO kámeletke tolmaǵandar isteri jónindegi mamandandyrylǵan aýdanaralyq sotynyń úkimimen atalǵan mektep direktory QR QK 140-baby 2-bóligine (qatygezdik tanytýmen ulasqan kámeletke tolmaǵan adamdy tárbieleý jónindegi mindetterdi oryndamaý) sáikes aiypty dep tanyldy.
Direktordyń birinshi ret qylmystyq quqyqbuzýshylyqqa barǵany eskerilip, oǵan 80 AEK kóleminde 202 myń teńge aiyppul salyndy. Sondai-aq pedagogikalyq laýazymdy qyzmetti jáne kámeletke tolmaǵandarmen bailanysty jumysty atqarýdan 2 jyl merzimge shettetildi.
Sonymen qatar BQO bilim basqarmasy basshylyǵy atyna osyndai quqyqbuzýshylyqtyń aldyn alý, óńir mektepterinde bilim alýshylarǵa qaýipsiz keńistik qalyptastyrý, sala qyzmetkerleri arasynda túsinik jumystaryn júrgizý maqsatynda jeke qaýly qabyldandy.
Sot úkimi zańdy kúshine engen joq.
