BQO qylmystyq ister jónindegi mamandandyrylǵan aýdanaralyq sotynda 45 jastaǵy Andrei Koshikovqa qatysty úkim shyqty, dep habarlaidy "Ult aqparat".
Sottyń baspasóz qyzmeti málim etkendei, A.Koshikov QR QK 99-baby 1-bóligine sáikes aiypty dep tanylyp, 13 jyl 3 ai merzimge bas bostandyǵynan aiyryldy.
Sottalýshynyń jazasyn qaýipsizdigi tótenshe qylmystyq-atqarý júiesi mekemesinde óteý belgilendi.
Sot úkim shyǵarǵan kezde qylmystyń sipaty men qoǵamǵa qaýiptiligin, sottalýshynyń turǵylyqty meken-jaiy boiynsha teris minezdemesin, onyń qylmys jasaǵannan keiingi minez-qulqyn, jábirlenýshi E.Bondarenkonyń eń qatań jazany taǵaiyndaý jónindegi pikirin eskerdi.
Sot talqysynda málim bolǵanyndai, A.Koshikov biylǵy 2 tamyzda shamamen saǵat 01.00-de óz úiinde birge turatyn N.Zýenkomen araq ishken. Sonyń saldarynan ekeýiniń arasynda kikiljiń týyndaǵan. Janjal kezinde A.Koshikov N.Zýenkony uryp-soǵyp, úiden shyǵaryp jibergen. Azamattyq nekedegi áieli páterge kirgizýin ótinip, esikti urǵylaǵan kezde A.Koshikov pyshaqpen soqqylar jasaǵan.
Alǵan dene jaraqattarynan N.Zýenko oqiǵa ornynda kóz jumdy.
A.Koshikovtiń kinási sotta tolyq dáleldendi.
Úkim zańdy kúshine engen joq.
