- Batys Qazaqstan oblysynda atyp alynǵan kiikterdiń ólekseleri tabyldy, dep habarlaidy Ult.kz tilshisi QazAqparat agenttigine siltme jasap.
QR AShM Orman sharýashylyǵy jáne janýarlar dúniesi komiteti oblystyq inspektsiiasynyń basshysy Qairat Qadeshevtiń aitýynsha, 30 jeltoqsan kúni Jańaqala aýdany aýmaǵynan kiiktiń 14 týshasy tabyldy. Brakonerler onyń jartysynyń múiizin kesip úlgergen de, qalǵanyn solai tastap ketken. Sol sekildi 4 qańtar kúni Bókei ordasy aýdanynan atyp alynǵan taǵy 20 kiik tabyldy.
«Jeltoqsan aiynda aiaqtalǵan kúiek naýqanynan keiin kiikter ábden álsiregen. Sondyqtan bylai shyǵyny da joq emes. Onyń ústine qardyń bir erip, qaita qatýynan keiin tebindei almaǵan janýarlar Qaztalov, Jánibek, Jańaqala, Bókei ordasy aýdandaryna qarai oiysýda. Bul olardy baqylaý jumysyn qiyndata túsýde. Qarshananyń jetkiliksizdiginen brakonerlerge tosqaýyl qoiý da qiyn. Degenmen «Ohotzooprom» óndiristik birlestigi filialymen birlese otyryp, jergilikti atqarýshy biliktiń kómegimen kiikti barynsha qorǵaý sharalary alynýda», - dedi Q.Qadeshev.
«Kúni búgin Jańaqala aýdany aýmaǵynda 20 myńdai kiik bar. Bókei ordasyna da az kirmegen. Sezgish janýar sanalatyn kiikterdiń bulai oiysýy tegin emes. Muzdaq bolyp, qystyń aiaǵy sozylyp ketse, jylqyǵa da qaýip tónýi ábden yqtimal», - dedi Jańaqala aýdanynyń ákimi Lavr Hairetdinov.
Eske sala keteiik, qazirgi tańda Qazaqstanda kiik eń kóp taralǵan aýmaq Batys Qazaqstan oblysy bolyp otyr. Ótken jylǵy kóktemde óńirde 70200 kiik sanaqqa ilikken bolatyn.
Barlyq quqyqtar qorǵalǵan. inform.kz belsendi siltemeni paidalanyńyz http://www.inform.kz/kz/bko-da-atyp-alyngan-34-bas-kiik-tabyldy_a2985990
