Batys Qazaqstan oblysynda biyl 484,9 myń sharshy metr turǵyn úi paidalanýǵa berilmekshi, dep habarlaidy "Ult aqparat".
BQO qurylys basqarmasy basshysynyń mindetin atqarýshy Nurken Moldashevtiń óńirlik kommýnikatsiialar qyzmeti alańynda ótken brifingide málim etkenindei, sonyń ishinde 120,1 myń sharshy metr turǵyn úi memlekettik biýdjet esebinen iske qosylmaqshy.
Atap aitqanda, 8 kóppáterli turǵyn úi (1377 páter) jáne aýyldyq eldi mekenderde 93 turǵyn úi (233 páter) tapsyrylmaqshy. Sonyń ishinde turǵyn úi qurylys jinaq banki salymshylary úshin 6 kóppáterli úi (963 páter) men aýyldarda 20 turǵyn úi (120 páter), jergilikti atqarý organdarynda kezekte turǵandarǵa 2 kóppáterli úi (414 páter) men eldi mekenderde 73 turǵyn úi (113 páter) beriledi.
N.Moldashevtiń sózine qaraǵanda, biyl 17 kóppáterli úi (2503 páter) men aýyldyq eldi mekenderde 139 úi (474 páter) qurylysy men 20 injenerlik kommýnikatsiialar infraqurylymy nysanyna «Nurly jer» baǵdarlamasy aiasynda 21,1 mlrd teńge bólindi.
Turǵyn úi qurylysy 2021 jyly da jalǵasady. Mysaly, jalǵa beriletin turǵyn úi qurylysyna aldyn ala respýblikalyq biýdjet esebinen 2,7 mlrd teńge bólý qoldaý tapty. Atalǵan qarajatqa Oral men Aqsai qalalarynda 2 kóppáterli turǵyn úi, Qaztalov, Jańaqala, Jánibek aýdandarynda 26 úidiń qurylysyn aiaqtaý josparlanýda. Oǵan qosa aýyldarda 26 turǵyn úi qurylysy bastalmaqshy.
Aldaǵy jyly injenerlik kommýnikatsiia tartýǵa 3,99 mlrd teńge berý de respýblikalyq biýdjet tarapynan qoldaý taýyp otyr. Buǵan Oral qalasy, Bórli, Tasqala, Bókei ordasy, Jańaqala, Shyńǵyrlaý, Qaztalov, Aqjaiyq, Terekti aýdandarynda 23 jobany júzege asyrý kózdelýde. Sonyń ishinde 19 joba boiynsha turǵyn úi qurylysy úshin jer telimderine injenerlik jeliler tartylatyn bolady.
«Sondai-aq kelesi jyly biyldan aýysatyn 7 kóppáterli turǵyn úidiń (onyń altaýy Oralda, bireýi Aqsaida) jáne Terekti aýdany Toqpai aýylynda 20 nesielik úidiń qurylysy márege jetpekshi», dedi N.Moldashev.
