Batys Qazaqstan oblysynda 380 memlekettik mekteptiń 249-y shtattyq rejimde, 131-i qashyqtan jumys jasaýda, dep habarlaidy "Ult aqparat".
Oblystyq bilim basqarmasynyń basshysy Aigúl Myńbaevanyń brifingte málim etkenindei, óńirde 111 myńnan astam oqýshynyń 22 paiyzy (24621) shtattyq rejimde, 48,6 paiyzy (54196) qashyqtan oqytylýda.
Oblysta bastaýysh synyp oqýshylarynyń 66,2 paiyzy (32681), mektepaldy daiarlyq synyptarynyń 53,3 paiyzy (4286) kezekshi synyptarmen qamtylǵan.
Sol sekildi 34 kolledjde 17 myńǵa jýyq stýdent bar.
Aýyldyq jerlerdegi kontingenti az 8 kolledjde oqý protsesi shtattyq rejimde uiymdastyryldy.
Sondai-aq 278 mektepke deiingi uiymda (80 jeke balabaqshada) kezekshi 1039 topta ata-analardyń ótinishi boiynsha 13172 búldirshin (barlyq balanyń 44,9 paiyzy) qamtylǵan.
Aigúl Ádilgereiqyzynyń sózine qaraǵanda, barlyq shtattyq rejimdegi jáne kezekshi synyptary bar mektepterdiń, kolledjderdiń, mektepke deiingi uiymdardyń jumysy sanitarlyq-epidemiologiialyq talaptarǵa sáikes júrgizilýde. Munyń saqtalýy oblys, qala, aýdan ákimdikteri jáne taýarlar men kórsetiletin qyzmetterdiń sapasy men qaýipsizdigin baqylaý basqarmalarynyń qatań baqylaýynda.
Qazirgi tańda qala men aýdandar ákimderi orynbasarlarynyń tóraǵalyǵymen mektepterdegi sanitarlyq talaptardyń qatań saqtalýyn qamtamasyz etý baǵytynda jáne ony qadaǵalaityn monitoringtik toptar quryldy.
Jańa oqý jyly bastalǵannan beri 5 oqýshydan koronavirýs anyqtaldy. Olardyń úsheýi – kezekshi synyptardaǵy bastaýysh synyp shákirtteri, ekeýi qashyqtan oqidy. Beseýi de indetti ata-anasy men týystarynan juqtyrǵan. Kúni búgin balalarda klinikalyq kórinister joq, ambýlatorlyq em alýda.
«Aýrý shyqqan synyptardaǵy barlyq oqýshylar men muǵalimderdiń koronavirýsqa tapsyrǵan synamalary teris nátije kórsetti. Sondyqtan 10 qazannan bastap Oral qalasyndaǵy №9 orta mektebiniń, 13 qazannan №6 orta mekteptiń kezekshi synyptary óz jumysyn qaita bastady», dedi A.Myńbaeva.
