Batys Qazaqstan oblysynda 3,1 mln astam dana maskany Máskeýge apara jatqandar ustaldy, dep habarlaidy "Ult aqparat".
QR UQK Shekara qyzmetiniń BQO boiynsha departamentinen podpolkovnik Asqar Qazbekovtiń málim etkenindei, oqiǵa 18 sáýirde «Syrym» ótkizý beketinde oryn aldy.
BQO boiynsha ekonomikalyq tergeý departamentimen birlese júrgizilgen «Kýrer» sharasy barysynda meditsinalyq maskany áketýdiń tórt deregi tirkeldi.
Saǵat 01.30-da shekarashylar qazaqstandyq azamat aidap kele jatqan «RENO» júk kóligin arnaiy tehnikalyq quraldardyń kómegimen teksergen kezde halyq tutynatyn taýarlar retinde jasyrylǵan 324 qorap tabyldy. Qoraptardy ashqan kezde 1,646 mln bir ret qoldanylatyn meditsinalyq maska shyqty.
Sol sekildi qyrǵyzstandyq azamat júrgizgen «VOLVO» avtokóligin teksergende, 229 qorap tabyldy. Munda 1,462 mln dana bir ret qoldanylatyn meditsinalyq maska jasyrylǵan bolyp shyqty.
Qazaqstandyq azamat aidaǵan «VOLVO» avtokóliginen 18 qoraptan 48 myń dana maska tabyldy.
Taǵy bir «VOLVO» avtokóliginen (júrgizýshisi – Qazaqstan azamaty) 5 qoraptan 9726 dana maska shyqty.
Bul kólikterdiń bári de Almatydan Máskeýge bara jatqan.
Barlyǵy 3 165 726 dana meditsinalyq maskanyń quny shamamen 380 mln teńgeni quraidy.
Qujattar rásimdelgennen keiin júk BQO boiynsha ekonomikalyq tergeý departamenti qyzmetkerlerine berildi.
Eske sala keteiik, budan buryn 464 myń maskany Máskeýge áketip bara jatqan júrgizýshiniń ustalǵanyn jazǵan bolatynbyz.
