Sýret: pixabay
Politsiia BQO-daǵy Araltóbe aýylynyń turǵyndaryn atys qarýymen jaraqattaǵan kúdiktini ustady, dep habarlaidy "Ult aqparat" Polisia.kz saityna silteme jasap.
IIM baspasóz qyzmetiniń málimetinshe, 5 qyrkúiekte Syrym aýdany Araltóbe aýylynda alkogoldik ishimdik ishken, mas kúidegi sharýa qojalyǵynyń basshysy men aýyl turǵynynyń arasynda janjal týyp, arty tóbeleske ulasqan.
Sol sátte qojalyq basshysy óziniń Lexus avtokóliginen áieliniń atyna tirkelgen ańshy myltyǵyn alyp, birneshe ret janyndaǵy er adamǵa qarai oq atqan.
Aýyl turǵynynyń sol jaq janbasyna jáne aiaǵyna jaraqat keltirilgen. Sondai-aq 59 jastaǵy áiel men onyń kishkentai nemeresi atys qarýynan jaraqattanǵan.
Asa aýyr qylmys jasaǵannan keiin kúdikti oqiǵa ornynan óz avtokóligimen boi tasalaǵan.
"Sol kúni adam óltirýge oqtalý faktisi boiynsha Qylmystyq kodekstiń 24-baby 3-bóligine, 99-baby 1-bóligine sáikes sotqa deiingi tergep-tekserý bastaldy.
Politsiia departamentimen "Tosqaýyl" jedel-jospary engizildi jáne óńirdiń barlyq jeke quramyna baǵdar berildi.
Nátijesinde politsiia qyzmetkerlerimen kúdikti ustalyp, ýaqytsha ustaý izoliatoryna qamaýǵa alyndy. Qylmys quraly tárkilenip, qylmystyq is materialdaryna tirkeldi" - delingen habarlamada.
Tergeý jalǵasyp jatyr, onyń nátijesi boiynsha qosymsha aqparat beriledi.
